Papa Françesku, i cili ka qëndruar i shtruar në spital për më shumë se një javë, mbetet në gjendje “kritike” dhe zhvilloi një “krizë respiratore astmatike” mëngjesin e së shtunës, sipas një deklarate të Vatikanit.
“Sot në mëngjes, Papa Françesku ka pasur një krizë respiratore astmatike me intensitet të zgjatur, e cila kërkoi gjithashtu aplikimin e oksigjenit me fluks të lartë,” shkruante Vatikani për Papën, i cili po trajtohet për pneumoni.
Ndërkohë që Papa “ka mbetur i vetëdijshëm dhe ka kaluar ditën në një kolltuk”, ai është “në më shumë dhimbje se dje”, shtoi deklarata, raporton CNN.
Ai gjithashtu mori transfuzione gjaku sot për të trajtuar aneminë, sipas deklaratës.
Më herët të shtunën, Vatikani njoftoi se Papa do të qëndrojë në spital pas diagnozës së pneumonisë dhe nuk do të mbajë lutjen javore të Angelusit – për herë të tretë gjatë papnisë së tij pothuajse 12-vjeçare.
Papa u shtrua në klinikën në kryeqytetin italian më 14 shkurt, dhe fillimisht ka bërë teste për infeksionin e rrugëve të frymëmarrjes. Më vonë ai u diagnostikua me pneumoni në të dyja mushkëritë pas një skanimi CT.
Françesku, i cili është nga Argjentina, ka një ndjeshmëri ndaj infeksioneve respiratore. Kur ishte i ri, ai vuajti nga një pneumoni e rëndë që çoi në heqjen e një pjese të mushkërive.
