Nxënësit dhe mësimdhënësit e shkollës “Zef Lush Marku” në Brekoc të Gjakovës tash e tutje procesin mësimor do ta zhvillojnë në kushte më të mira, pas rinovimit të objektit shkollor.
Kjo, pasi këto ditë përfunduan punimet në rinovimin e tërësishëm të objektit shkollor, brenda dhe jashtë tij, përfshirë këtu edhe dy poligonet sportive dhe bibliotekën me sallë të leximit. Po ashtu të gjitha klasat për mësim dhe 7 kabinete në kuadër të tyre, janë kompletuar tërësisht.
“Renovimi i shkollës ka qenë shumë i mirëseardhur, këtu në shkollën tanë janë ndërtuar gjithsej shtatë kabinete të cilat mundësojnë që përveç punës teorike mund të zhvillojmë edhe punë praktike”, tha Patrik Pepaj, nxënës i kësaj shkolle.
E lumtur për kushte më të mira në shkollë është shfaqur edhe nxënësja, Leona Komoni.
“Jemi shumë të lumtur që i kemi të gjitha kushtet e mira si për shembull ngrohjen, sallën e edukatës fizike përpos kabineteve që do të thotë i kemi kushtet maksimale”.
Arsimtarja e lëndëve Kimi e Biologji tha se ndër renovimet është edhe kabineti kimi – biologji, i pajisur me të gjitha mjetet e nevojshme për zhvillimin e lëndës, jo vetëm në mënyrë teorike, por edhe praktike.
Drejtori, Pjetër Doda, ka treguar në detaje çka është rinovuar në objektin e shkollës.
“Kulmi dhe izolimi i jashtëm tërësisht, të gjitha dyert dhe dritaret, ngrohja qendrore, ngjyrosja brenda dhe jashtë tërësisht, kështu që kjo faktikisht është një godinë e re. Ka 7 kabinete domethënë i plotëson kushtet për një shkollë evropiane”, tha ai.
Kryetari i Komunës, Ardian Gjini, konsideron se përfundimi me sukses i këtyre punimeve ka qenë shumë i domosdoshëm.
“I kemi pasur të zotuara fondet e Bashkimit Evropian, edhe ka qenë jetike që komuna e Gjakovës të buxhetonte dhe të përfundonte renovimin e kësaj shkolle”, tha ai.
Sipas zyrtarëve të arsimit në Gjakovë, kostoja e përgjithshme e këtij projekti ishte mbi 250 mijë euro.
