Shkruan: Halil GECI
Të gjithë ata që i kritikuan dhe i përbuzën skajshmërish këta komandantë treguan se janë fituesit e vërtetë të votave. Nëse këta kanë mend, duhet ta kuptojnë se koha e tyre ka mbaruar. Boll më me plaçkë e hajni; e keni lodhur këtë vend. I keni bërë kundërshtarë edhe fëmijët tuaj, e mos të flasim për të afërmit, miqtë, shokët e dashamirët.
Zgjedhjet e 9 shkurtit treguan qartë se pozitat politike të komandantëve të luftës janë dobësuar ndjeshëm. Sjelljet e tyre të dyshimta, herë si “djaj” e herë si “fëmijë”, kanë kontribuar në këtë rënie.
Pas luftës, shumë prej këtyre komandantëve u përfshinë në veprime të paligjshme, duke tradhtuar besimin e popullit që dikur i shihte si heronj.
Ata u bënë të njohur për një vit luftë si heronj, e për dy dekada të tjera pas lufte u identifikuan si uzurpatorë plaçkash dhe hajdutë.
Këto veprime kanë zhgënjyer jo vetëm qytetarët, por edhe familjet e tyre, duke bërë që edhe fëmijët e tyre të ndihen të turpëruar dhe të pyesin veten për identitetin e tyre.
Në zgjedhjet e fundit, ata morën më shumë vota nga rrethe të largëta sesa nga vendlindjet e tyre, pasi në komunitetet e tyre njihen si hajdutë dhe uzurpatorë. Kjo tregon se populli është lodhur nga padrejtësia dhe korrupsioni.
Ndryshimi i qartë në preferencat e votuesve, veçanërisht të rinisë, e cila duket se është distancuar nga figurat e vjetra politike, por edhe nga komandantët e luftës, ka dhënë shenja se koha ka filluar për së mbari.
Ata duhej të ishin tërhequr nga politika kur ish-sekretari James Rubin u kërkoi të hapnin rrugën për mendjet e reja dhe dijen; mosdëgjimi i tij i ka çuar në një situatë të pafavorshme.
Ata që nuk dëgjuan këshillën e James Rubin tani po përballen me pasoja të rënda: disa janë në Hagë, disa mund të përfundojnë në Hagë, ndërsa të tjerët janë shpallur “non grata”, të barazuar me figura si Bin Laden.
