Pavarësisht dallimeve të mëdha në pikëpamje, Donald Trump dhe Emmanuel Macron thanë sot se duan të punojnë së bashku për t’i dhënë fund luftës në Ukrainë, në përvjetorin e tretë të fillimit të pushtimit rus të vendit.
Një duzinë ministra evropianë të mbrojtjes u takuan sot përmes videokonferencës me homologët e tyre ukrainas për të koordinuar pozicionet përballë ofensivës diplomatike amerikano-ruse që synon t’i japë fund luftës, nga e cila vendet e tyre janë të përjashtuara, raporton AFP. Ky takim, i bashkëkryesuar nga ministri estonez Hanno Pevkur dhe ai francez Sébastien Lecornu në Talin, mblodhi për një orë bashkë edhe ministrat e Lituanisë, Letonisë, Norvegjisë, Finlandës, Suedisë, Danimarkës, Islandës, Holandës, Gjermanisë, Italisë dhe Polonisë.
Morën pjesë gjithashtu ministri ukrainas i Mbrojtjes Rustem Umarov dhe përfaqësues të NATO-s dhe Bashkimit Evropian.
Qëllimi i kësaj videokonference, të mbajtur në përvjetorin e tretë të fillimit të pushtimit në shkallë të gjerë të Ukrainës, ishte të “bashkonte” vizionin e evropianëve për kushtet për një paqe të qëndrueshme dhe garancitë e sigurisë shoqëruese, sipas një burimi francez të afërt me diskutimet.
Në një moment, Trump u pyet nëse ai besonte se Ukraina do të duhet të heqë dorë nga territori si pjesë e ndonjë bisede paqeje.
“Do të shohim”, u tha ai gazetarëve. “Këto janë negociata që sapo kanë filluar”, shtoi ai.
Kthimi i tokës ukrainase të pushtuar nga Rusia, shtoi ai, “nuk është një gjë e lehtë”.
Trump ka sugjeruar më parë se Ukraina mund të rimarrë “disa” nga territori i saj dhe javën e kaluar tha se pushtimi i tokës ukrainase nga Rusia do të thotë se ajo “ka kartat” në negociata.
Trump tha gjithashtu se Vladimir Putin do të pranonte një forcë paqeruajtëse evropiane në Ukrainë nëse dhe kur të përfundojë lufta – një sugjerim që Kremlini e ka thënë vazhdimisht se e kundërshton.
Teksa nisin bisedimet mes Donald Trump dhe presidentit francez Emmanuel Macron, Christophe Lemoine i Ministrisë së Jashtme franceze ka zbuluar dy qëllime kryesore që Macron dëshiron të arrijë.
“Qëllimi i parë është të kujtojmë se duhet të ketë një shtysë për një plan paqeje solid dhe të fortë për Ukrainën, me diskutime që do të përfshijnë Ukrainën dhe evropianët,” tha Lemoine.
Ai theksoi gjithashtu se mesazhi i dytë që Franca dëshiron t’i përcjellë Trumpit është i qartë: “Nuk është në interesin e tij strategjik të vazhdojë diskutimin për t’i dhënë gjithçka Rusisë”. Lemoine theksoi rëndësinë e bisedimeve serioze jo vetëm për një armëpushim, por edhe për një “plan të fortë paqeje” që mund të sigurojë paqen afatgjatë në Ukrainë.
