Me kërkesën e vazhdueshme për të parë dokumentin nga intervistimi i vitit 2019, njëri ndër komandantët e Ushtrisë Çlirimtare të Kosovës, Ismet Tara ka vazhduar dëshminë para Dhomave të Specializuara në Hagë.
Në ditën e dytë të dëshmisë, Tara ka përsëritur se nuk do t’i përgjigjet pyetjeve të prokurores, të cilën e akuzoi se e ka humbur qëllimshëm dokumentin që po kërkon.
Rodney Dixon, avokat i Kadri Veselit, “A do tu përgjigjesh pyetjeve të mbrojtjes, po a jo?
Ismet Tara, ish-komandant I UÇK-së tha “Mbrojtjes po, por të prokurores sime e cila e ka mshefur dokumentin, jo”.
Mbrojtja e Veselit e pyeti Tarën se çka përmban saktësisht dokumenti të cilin po e kërkon me kaq ngulm.
Ismet Tara, ish-komandant i UÇK-së, theksoi se “Ai dokument nuk është përshkruar në prezencën time, nuk më është treguar kurrë mua, as për tu lexuar, as nuk e kam nënshkruar dhe as s’kam pas njohuri për atë dokument që 5 vite me radhë, vetëm se me datën19 të mërkurën në përgatitjen time me stafin e prokurores, më është treguar për herë të parë, ai dokument përshkruan Tarën sipas përshkrimit të intervistueseve, hetuesve, prokurorëve të mi sikurse Ismet Tara të kish thënë se Ismet Tara i din shumë krime që kanë ndodhur që ka bo krime UÇK-ja që ka vrarë civil, që ka djegur shtëpi, që ka bo krime jonjerëzore sipas atyre përshkrimeve, janë dy flet që unë si kam nënshkruar unë kurrë”.
Tara që kishte nofkën komandant Hoxha tha se edhe dokumenti i prezantuar i UNMIK-ut i vitit 2001 është trillum dhe se asnjëherë nuk ka pasur takime me ta.
“Ismet Tara nuk ka asnjë dëshmi që dikush është vrarë, nuk i ka ndodhur Ismet Tarës që të japë dëshmi të rreme atëherë. Hiqma këtë dokument se nuk mund ta shoh më, nuk mund ta shoh më. Ti mund të bësh pyetje sa dush, por kur i dedikohesh këtij dokumenti… unë po them që as nuk i kam dhënë as nuk e kam takuar”, shtoi Tara.
Para se të përfundonte dëshminë, Tara insistoi t’i lejohen disa minuta për të dhënë sqarime shtesë, ku lexoi një përmbledhje për situatën e tij.
“Kur pashë se dokumenti ishte nënshkruar nga ekipi i intervistuesve të mi. Leximin e bëri përkthyesja ime, duke qarë ndryshova mendimin për gjykatën, hetuesit, dhe prokurorët, se janë armiqtë e mi, të UÇK-së, pavarësisë së Kosovës dhe popullit. Kërkova sqarime duke kërkuar e sharë intervistuesit e mi si kanë guxuar të më rrezikojnë. Tradhtarë të luftës, dhe të martirëve. Prej dokumentit më kujtohet vetëm të zezat që më janë përshkruar”.
Me këtë përfundoi intervistimi i Taras. Dhomat e Specializuar rifillojnë gjykimin më 17 mars.
