Policia e Kosovës përmes një postimi në Facebook ka lëshuar një apel të rëndësishëm për qytetarët, duke u kërkuar atyre të jenë të vëmendshëm ndaj mesazheve dhe email-eve të dyshimta që mund të përmbajnë lidhje mashtruese.
Në postim Policia e Kosovës njoftoi: ” Apel për kujdes ndaj phishing-ut! Të nderuar qytetarë, ju lutemi të jeni të vëmendshëm ndaj mesazheve dhe email-eve të dyshimta që mund të përmbajnë lidhje mashtruese”.
Tutje në apel, Policia thekson se qytetarët nuk duhet të hapin lidhje të dyshimta dhe as të ndajnë të dhënat e tyre personale me burime të panjohura, pasi kjo mund të çojë në viktimizimin nga sulme të mundshme kibernetike.
“Mos hapni dhe mos ndani të dhëna personale me burime të panjohura, pasi mund të bëheni viktimë e sulmeve kibernetike”, ka thënë Policia, duke shtuar se në rast dyshimi qytetarët mund të kontaktojnë Policinë e Kosovës për mbështetje dhe verifikim, duke përdorur numrin e urgjencës 192.
Po ashtu Policia ka bërë thirrje edhe për kujdes nga mashtrimi nëpërmes SMS-ve. “Jemi duke vërejtur një rritje të ankesave të qytetarëve për raste të mashtrimeve përmes mesazheve telefonike (SMS), ku qytetarët pranojnë mesazhe që përmbajnë Link-e të dyshimta dhe duke klikuar në këto linke, mashtruesit mund të fitojnë casje në llogaritë bankare të qytetarëve ose të dhëna tjera personale me c’rast nga llogarit bankare në mënyrë të paligjshme të dyshuarit përfitojnë të holla”, thuhet në thirrjen e Policisë.
Policia tutje ka thënë se për të i mbrojtur qytetarët nga mashtrime të tilla bëjnë thirrje dhe apel të merren parasysh këshillat e mëposhtme.
“Mos klikoni asnjë link të dyshuar që i pranoni përmes mesazheve (SMS) telefonike.
Mos jepni të dhënat tuajt personale si fjalëkalime apo informacione bankare përmes faqeve të panjohura. Verifikoni çdo mesazh të dyshimtë duke kontaktuar drejtpërdrejt institucionin ose kompaninë që pretendohet se ju ka dërguar mesazhin. Raporto Rastin tek Autoritetet përkatëse ose ta banka e juaj (të bllokojnë transferin e të hollave) nëse keni dhënë informacione të ndjeshme”, apelon Policia.
Në thirrjen e Policisë po ashtu thihet se nëse keni dyshime ose keni rënë viktimë e një mashtrimi të tillë, të kontaktoni menjëherë autoritetet përkatëse Policore. “Për sigurinë tuaj, tregohuni të kujdesshëm dhe mos bini pre e mashtrimeve. Bashkangjitur e keni foton e një lnku mashtrues që po dërgohet në formë SMS te qytetarët kohët e fundit. Mos Klikoni”, përfundon thirrja e Policisë.
