Në një përpjekje për të riinterpretuar dhe ndriçuar një periudhë kyçe të historisë së Kosovës, Instituti Albanologjik i Prishtinës organizoi konferencën shkencore “Kosova gjatë shekullit XIX: Një vështrim shkencor mbi dinamikat sociale”.
Qëllimi kryesor i këtij takimi është zhvillimi i një analizë të thelluar të dinamikave sociale, politike dhe ekonomike që formësuan Kosovën gjatë shekullit XIX.
Profesor dr. Nuredin Ahmeti, shef i degës së Historisë, në adresimin e tij tha se studiues të ndryshëm shekullin e XIX e kanë quajtur si ‘shekulli i gjatë i Perandorisë Osmane’, për shkak të ngjarjeve që ndodhën brenda tij.
“Reformat e njohura gjatë këtij shekulli në Perandorinë Osmane dhe pakënaqësitë e prodhuara nga këto reforma janë shpërfaqur me reagime të ndryshme nga popullata”, tha prof. Ahmeti, teksa përmendi edhe studiues turq, që kanë trajtuar këtë periudhë kohore në studimet e tyre shkencore.
Ahmeti tha se historiografia shqiptare është përqendruar në zbardhjen e ngjarjeve, luftërave, kryengritjeve në këtë shekull.
“Zbardhja e luftërave, konflikteve është në interes për të kaluarën, por edhe për të tashmen tonë, por edhe zbardhja e aspekteve sociale”, tha Ahmeti, derisa përmendi historianë shqiptarë që kanë trajtuar këtë kohë në shkrimet e tyre në shkencën e historisë, si: Hasan Kaleshi, Skënder Riza, etj.
Lidhur me aspektin ekonomiko-social të ngjarjeve në shekullin XIX, Ahmeti tha se studiues të rinj kanë trajtuar dhe vazhdojnë ta trajtojnë në mënyrë të thukët.
Në këtë konferencë janë duke marrë pjesë shumë studiues të historisë dhe të fushave të tjera shkencore, si dhe personalitete të shumta shkencore.
