Eshtrat e njeriut janë gjetur në kërkimin e trupit të një viktime të vrasjes në Mbretërinë e Bashkuar, raporton Sky News . Rania Alayed u vra nga bashkëshorti i saj Ahmed al-Khatib në vitin 2013, por trupi i saj nuk u gjet kurrë. Një vit më vonë ai u dënua me burgim të përjetshëm dhe nuk dihen detajet se si u vra viktima.
Policia, e cila kishte kërkuar trupin e viktimës gjatë gjithë kohës, gjeti mbetje njerëzore në North Yorkshire. Kërkime të shumta janë kryer gjatë viteve, tha policia në Mançester, ku jetonte çifti.
Pasi morën informacione të reja dje, oficerët gjetën mbetje njerëzore të varrosura pranë A19 në Thirsk. “Edhe pse ende nuk është bërë identifikimi zyrtar, dyshojmë se eshtrat i përkisnin Ranias”, tha policia. “Familja e viktimës është informuar për zhvillimet e fundit dhe ka mbështetjen e policisë. Ata janë në qendër të mendimeve tona”, shtuan ata.
Djali i viktimës: Kjo është e vetmja gjë që kam kërkuar në 11 vitet e fundit
“Zbulimi i eshtrave të nënës sime, më shumë se një dekadë pas vrasjes së saj, ishte një surprizë joreale për mua dhe familjen time”, tha Yazan Alayed, djali i gruas së vrarë. “Mundësia për t’i siguruar asaj një vend prehjeje është e vetmja gjë që kemi kërkuar në 11 vitet e fundit. Mundësia për të vendosur disa lule në varrin e nënës sime është më shumë se sa mund të kërkoja ndonjëherë në këtë botë,” tha ai.
Detektivi Neil Higginson tha se vrasja e Rania Alayed ishte e tmerrshme dhe mungesa e njohurive për vendndodhjen e trupit të saj shtoi dhimbjen për ata që e njihnin. “Më shumë se një dekadë pas vrasjes së saj, ne besojmë fuqimisht se kemi gjetur trupin e saj dhe më në fund mund t’i japim paqe familjes së saj, e cila e dimë se ka vuajtur shumë dhimbje dhe pikëllim ndër vite. Pas gjithë kërkimeve tona ndër vite, ne e kemi mbajtur gjithmonë të informuar familjen dhe do t’u japim atyre informacione të reja sapo ta marrim”, tha ai.
Rania Alayed ka lindur në Siri dhe u takua me burrin e saj kur ajo ishte pesëmbëdhjetë vjeç. Çifti u largua nga Lindja e Mesme dhe përfundimisht u transferua në Angli. Ata kishin tre fëmijë, por ajo la një martesë të pakënaqur të karakterizuar nga dhuna, u dëgjua në gjyq. Për këtë ka reaguar bashkëshorti duke i marrë jetën.
