Autoritetet ukrainase kanë lëshuar informacione të reja në lidhje me një sulm me dron rus gjatë natës në qytetin verilindor të Ukrainës, Kharkiv.
Më herët, zyrtarët ukrainas raportuan se shtatë persona u plagosën në sulmin “masiv”. Megjithatë, shifrat e fundit bëjnë me dije se numri i të plagosurve ka shkuar në 12, mes të cilëve dy fëmijë. Mes viktimave ishin katër pacientë në një spital në qendër të qytetit.
Sipas zyrës së prokurorit ukrainas, ndërtesat e banimit, farmacitë, kafenetë dhe dyqanet u dëmtuan në sulm.
Sulmi ndodhi pak pasi presidenti ukrainas Volodymyr Zelensky u largua nga Shtëpia e Bardhë dje.
Ukrainë: Rrëzuam 103 dronë, 51 u zhdukën nga radarët
Forcat ruse lëshuan gjithsej 154 dronë sulmues gjatë natës së 28 shkurtit deri më 1 mars. Mbrojtja ajrore e Ukrainës arriti të rrëzojë 103 dronë, ndërsa 51 të tjerë “u zhdukën nga radarët”, sipas zyrtarëve ukrainas.
Sipas autoriteteve ukrainase, sulmi u krye nga dronët e nisur nga qytetet ruse të Oryol, Bryansk, Kursk, Millerovo dhe Primorsko-Akhtarsk.
Dronët e rrëzuar u konfirmuan në rajonet Kharkiv, Poltava, Sumy, Kyiv, Chernihiv, Cherkasy, Kirovohrad, Dnipropetrovsk, Donetsk, Kherson, Odessa dhe Mykolaiv.
Forcat Ajrore të Ukrainës raportuan se rajonet e Kharkiv, Odessa, Sumy, Chernihiv, Cherkasy dhe Kyiv pësuan dëme nga rënia e mbeturinave nga dronët e rrëzuar.
