Sekretari i Përgjithshëm i Lëvizjes vetëvendosje, Alim Rama thotë se procesi i numërimit të votave me postë nga diaspora, ka zbuluar, sipas tij, parregullsi të shumta. Ai ka thënë se për Lëvizjen Vetëvendosje është thelbësore që të bëhet një hetim i plotë.
“Shpallja e qindra fletëvotimeve të pavlefshme, përkundër qartësisë së vullnetit të votuesve, duket të mos jetë e vetmja parregullsi e evidentuar në këtë proces. Rritja artificiale e LDK-së përmes votimit me postë, në shpërputhje të thellë me rezultatet në Kosovë dhe me ato në përfaqësitë diplomatike, ka ngritur dyshime mbi besueshmërinë e këtij procesi”, ka shkruar Rama.
Sipas tij , parregullsitë kanë të bëjnë me rritjen siç e ka quajtur ai, artificiale të LDK-së me mbi 400%, krahasuar me votimin në përfaqësi diplomatike.
“Por, ato bëhen edhe më serioze kur analizohen votat për kandidatin e kësaj partie, Hysen Çekaj, si dhe të disa kandidatëve tjerë. Derisa në Kosovë ai ka marrë 11,268 vota dhe vetëm 98 nga votimi në ambasada, pas numërimit të votave me postë, ai renditet si kandidati i tretë më i votuar, me plot 12,000 vota deri tash”, ka shkruar ai.
Sipas Ramës, për Lëvizjen Vetëvendosje është thelbësore që të bëhet një hetim i plotë. Ai thotë se shkeljet dhe parregullsitë e evidentuara janë raportuar në polici dhe prokurori.
“Për Lëvizjen Vetëvendosje është thelbësore që të bëhet një hetim i plotë për të gjitha parregullsitë e raportuara për të siguruar një proces zgjedhor të pastër, të drejtë dhe të ndershëm. Shkeljet dhe parregullsitë e evidentuara tashmë janë raportuar në polici dhe prokurori nga Lëvizja Vetëvendosje, megjithatë, prokuroria ende nuk ka ndërmarrë asnjë veprim”, ka shkruar ndër të tjera ai.
