Udhëheqësit arabë kanë miratuar një plan egjiptian për rindërtimin e Gazës që do të kushtonte 53 miliardë dollarë dhe do të shmangte zhvendosjen e palestinezëve, në kontrast me vizionin e Presidentit të SHBA Donald Trump për një “rivierë të Lindjes së Mesme”.
Presidenti egjiptian Abdel Fattah al-Sisi tha se propozimi u pranua në mbylljen e samitit në Kajro dhe tha se ishte i bindur se Trump do të kishte sukses në arritjen e paqes në konfliktin që ka shkatërruar Rripin e Gazës.Pyetjet kryesore që duhet të marrin përgjigje për të ardhmen e Gazës janë se kush do të qeverisë enklavën dhe cilat vende do të japin miliarda dollarët e nevojshëm për rindërtimin.
Sisi tha se Egjipti ka punuar në bashkëpunim me palestinezët për të krijuar një bord administrativ të teknokratëve palestinezë të pavarur dhe profesionistë, të cilëve u është besuar administrimi i Gazës.
Komiteti do të jetë përgjegjës për mbikëqyrjen e ndihmës humanitare dhe menaxhimin e punëve në rrip për një periudhë të përkohshme, në përgatitje për kthimin e Autoritetit Palestinez (AP).
Çështja e dytë kritike është fati i Hamasit.
Presidenti palestinez Mahmoud Abbas tha se ai e mirëpriti idenë egjiptiane dhe i kërkoi Trumpit të mbështeste një plan të tillë që nuk do të përfshinte zhvendosjen e banorëve palestinezë.
