Shkruan: Hyzri SALIHU
Epopeja e lavdishme e UÇK-së dhe rënia heroike e Komandantit Legjendar Adem Jashari, bashkë me familjen e tij, simbolizojnë hapjen e rrugës për zgjidhjen e Çështjes Shqiptare, veçanërisht asaj të Kosovës, në një kohë vendimtare.
Ky akt heroik ndërgjegjësoi botën mbarë, e faktorizoi kombin shqiptar dhe unifikoi energjinë e madhe të mërgatës shqiptare.
Historikisht, muaji mars u ka sjellë shqiptarëve tragjedi dhe sprova të mëdha.
5, 6 dhe 7 Marsi i vitit 1998 dëshmoi se shqiptari, familja dhe populli i tij, për lirinë e kombit dhe për paqen universale botërore, flijohen me gjithë qenien e tyre.
Në këtë betejë të lavdishme, në kështjellën e qëndresës shqiptare, qëndruan stoikisht tre breza të familjes Jashari: plaku Shaban Jashari, strategu i luftës Hamëz Jashari dhe vetë Komandanti Legjendar Adem Jashari.
Shaban Jashari, si kryefamiljar dhe atdhetar i madh, e edukoi familjen me dashurinë për lirinë dhe për kombin. Ai ishte themeli i fortë mbi të cilin u ngrit rezistenca e Jasharajve dhe i pari që e pranoi me krenari dhe vetëdije sakrificën sublime për lirinë e Kosovës.
Hamëz Jashari, strateg dhe luftëtar i paepur, krah i djathtë i Adem Jasharit, ishte mendja dhe forca që i dha formë dhe organizim luftës për liri.
Me vizionin e tij të qartë për çlirimin e Kosovës dhe bashkimin kombëtar, ai ishte një ndër arkitektët e rezistencës së armatosur që i dha UÇK-së fuqinë për të sfiduar makinerinë shtypëse serbe.
Adem Jashari, emblema e luftës për liri, udhëhoqi betejën me guxim të pashoq, duke e kthyer shtëpinë e tij në fortesën e pamposhtur të shqiptarëve.
Me heroizmin e tij, ai vulosi një epokë të re në historinë shqiptare, duke dëshmuar se liria fitohet vetëm me sakrificë dhe gjak.
Shtëpia e Jasharajve në Prekaz u bë kalaja e shqiptarisë, ku u vendos fati i luftës për çlirimin e Kosovës. Aty, mbi rrënojat e asaj familjeje heroike, lindi një epokë e re – epoka e ushtrisë çlirimtare dhe e lirisë së Kosovës.
Brezat e sotëm dhe ata të ardhshëm do ta kenë frymëzim të përjetshëm emblemën e familjes Jashari, që me gjakun e saj vulosi rrugën drejt bashkimit kombëtar.
Bac, ushtria që ti krijove është duke e vazhduar rrugën, dhe ne premtojmë ta përmbushim me sukses betimin ushtarak për Shqipëri Etnike!
Lavdi Dëshmorëve të Kombit, në të gjitha brezat!
