Administrata Trump ka qenë në bisedime të drejtpërdrejta me Hamasin për lirimin e pengjeve amerikanë të mbajtur nga Hamasi në Gaza dhe mundësinë e një marrëveshjeje më të gjerë për t’i dhënë fund luftës, i thanë Axios dy burime , të cilët portali amerikan pretendon se ishin të përfshirë drejtpërdrejt në negociata.
Axios raporton se këto negociata, të udhëhequra nga i dërguari i Trump për çështjen e pengjeve, Adam Boehler, janë të paprecedentë, sepse SHBA-ja kurrë më parë nuk ka negociuar drejtpërdrejt me Hamasin, të cilin e cilësoi si organizatë terroriste në 1997.
Portali amerikan thekson se takimet mes Beohler dhe zyrtarëve të Hamasit janë mbajtur në Doha javët e fundit.
Përveç pengjeve, ata diskutuan edhe një armëpushim afatgjatë në Gaza
Megjithëse administrata Trump u konsultua me Izraelin për mundësinë e angazhimit me Hamasin, Izraeli mësoi për pjesë të këtyre negociatave përmes kanaleve të tjera, tha një burim. Burimet folën me Axios në kushte anonimiteti.
Negociatat u përqëndruan pjesërisht në lirimin e pengjeve amerikane, gjë që bie në përgjegjësinë e Boehler si i dërguar i pengjeve.
Megjithatë, një marrëveshje më e gjerë për të liruar të gjithë pengjet e mbetur dhe për të arritur një armëpushim afatgjatë u diskutua gjithashtu, thanë burimet. Por nuk u arrit asnjë marrëveshje.
Ndryshimi i qasjes amerikane ndaj situatës në Gaza
I dërguari i Shtëpisë së Bardhë Steve Witkoff gjithashtu planifikoi të udhëtonte në Doha këtë javë për t’u takuar me kryeministrin e Katarit rreth bisedimeve të armëpushimit, por e anuloi udhëtimin pasi nuk pa ndonjë përparim nga Hamasi, tha një zyrtar amerikan.
Qasja e Trump ndaj konfliktit ndryshon thelbësisht nga ajo e Bidenit, duke përfshirë kërcënimet e përsëritura të “ferrit” për Hamasin dhe një propozim për një “marrje” të Gazës nga SHBA.
Negociatat e drejtpërdrejta me Hamasin, veçanërisht pa pëlqimin e Izraelit, janë një hap që administratat e mëparshme nuk e kanë ndërmarrë.
Si është situata me pengjet në Gaza?
Sa i përket situatës aktuale të pengjeve, 59 mbahen ende nga Hamasi në Gaza. Forcat e Mbrojtjes së Izraelit konfirmojnë se 35 prej tyre janë vrarë.
Inteligjenca izraelite beson se 22 pengje janë ende gjallë dhe statusi i dy të tjerëve nuk dihet.
Pengët e mbetur përfshijnë pesë amerikanë, përfshirë 21-vjeçarin Edan Alexander, i cili besohet të jetë gjallë.
Armëpushimi 42-ditor, i cili ishte pjesë e fazës së parë të marrëveshjes së Gazës, skadoi të shtunën pasi palët nuk arritën një marrëveshje për zgjatjen e saj.
Luftimet nuk kanë rifilluar, por Izraeli ka pezulluar të gjitha dërgesat e ndihmave humanitare në Gaza, ku rreth 1.9 milionë palestinezë, rreth 90% e popullsisë, janë zhvendosur nga lufta dhe janë në rrezik nga uria.
Shtëpia e Bardhë dhe Zyra e Kryeministrit izraelit nuk komentuan përpara raportit të Axios.
