Siç vë në dukje Reuters, të dyshuarit u arrestuan më 5 mars, në të njëjtën ditë kur Bukureshti shpalli atasheun ushtarak rus Viktor Makovsky dhe zëvendësin e tij Yevgeny Ignatyev persona non grata për veprime në kundërshtim me normat diplomatike. Ata u urdhëruan të largoheshin sa më shpejt nga vendi. Moska tha të mërkurën se do t’i përgjigjet lëvizjes.
Më 6 mars, Drejtoria Kombëtare për Hetimin e Krimit të Organizuar dhe Terrorizmit (DIICOT) tha se gjashtë persona, përfshirë një gjeneral në pension të ushtrisë rumune, u akuzuan për krijimin e një grupi kriminal “me qëllim të minimit të sovranitetit dhe pavarësisë së Rumanisë dhe të ndikojë në aftësitë mbrojtëse të vendit”.
Në një deklaratë, prokurorët e DIICOT thanë se gjashtë individët formuan një “grup të organizuar” në vitin 2023 dhe më pas vepruan sipas një plani të menduar me kujdes për të minuar shtetin rumun.
Autoritetet nuk i kanë dhënë emrat e të dyshuarve. Megjithatë, burime gjyqësore i thanë Shërbimit Rumun të Radios Evropa e Lirë/Radio Liberty se në mesin e të përmendurve në këtë rast është komandanti ushtarak në pension Radu Teodoru, tani 101 vjeç. Ai nuk u ndalua, por më 5 mars, sipas vajzës së tij, hetuesit erdhën në shtëpinë e tij, sipas një publikimi të shërbimit rumun të korporatës sonë mediatike.
Në fund të vitit 2024, një skandal shpërtheu në Rumani pas raundit të parë të zgjedhjeve presidenciale, të cilat u fituan nga politikani i ekstremit të djathtë Calin Georgescu. Shërbimet e inteligjencës deklaruan se kundër këtij kandidati mund të ishte kryer një fushatë ilegale në emër të Rusisë. Vetë Georgescu e mohon këtë. Ai e quajti vendimin e Gjykatës Kushtetuese të 6 dhjetorit për të përmbysur rezultatet e raundit të parë një sulm ndaj “vlerave themelore të popullit rumun”. Georgescu është vënë nën mbikëqyrje gjyqësore. Ai përballet me akuza penale për veprimtari kundër rendit kushtetues, shpërndarje të informacionit të rremë, deklarata të rreme dhe krijimi i grupeve ksenofobike dhe antisemite.
Sipas disa informacioneve, zëvendësatasheu ushtarak Yevgeny Ignatyev, i cili u shpall persona non grata në Rumani, mund të kishte qenë i lidhur me Calin Georgescu.
Zgjedhjet e përsëritura presidenciale në Rumani janë caktuar për 4 maj.
Inxhinieri bujqësor Calin Georgescu, 62 vjeç, ishte më parë një anëtar i Aleancës së ekstremit të djathtë për Bashkimin e Rumunëve, e cila synon të bashkojë Rumaninë dhe Moldavinë. Ai kandidoi në zgjedhjet presidenciale si kandidat i pavarur. Gjatë fushatës zgjedhore, Georgescu kritikoi NATO-n dhe ndihmën ushtarake për Ukrainën dhe bëri thirrje për afrim me Rusinë.
Gjatë tre viteve të fundit, numri i personelit diplomatik rus të akredituar në Bukuresht është ulur me dy të tretat. Në të njëjtën masë ka rënë edhe numri i personelit rumun të akredituar në Federatën Ruse.
