Gjermania i bëri thirrje të premten entitetit RS të Bosnje dhe Hercegovinës që të respektojë sovranitetin dhe integritetin territorial të shtetit, mes shqetësimeve në rritje për ngjarjet e fundit në Bosnje dhe Hercegovinë.
Zëdhënësi i Ministrisë së Jashtme Sebastian Fischer kritikoi Republikën Srpska (RS) për miratimin e ligjeve të diskutueshme këtë javë, duke e quajtur atë një “sulm masiv” ndaj rendit kushtetues të vendit, raporton Anadolu Agency .
Ligjet ndalonin policinë e shtetit dhe gjyqësorin e vendit të vepronin në territorin e njësisë së Republikës Srpska.
“U bëjmë thirrje të gjithë aktorëve politikë të brendshëm dhe të jashtëm që të mbrojnë sovranitetin, integritetin territorial dhe pavarësinë e shtetit të Bosnjë dhe Hercegovinës”, tha Fischer, duke paralajmëruar se heqja e juridiksionit të policisë së shtetit dhe autoriteteve gjyqësore mund të rrezikojë sigurinë e popullatës lokale.
Zëdhënësi i ministrisë shprehu siguri se Bosnja dhe Hercegovina mund të mbështetet te partnerët e saj ndërkombëtarë, duke vënë në dukje se Këshilli i Sigurimit i OKB-së, në takimin e tij të enjten, konfirmoi angazhimin e tij ndaj Marrëveshjes së Paqes të Dejtonit.
Ai shtoi se Gjermania rezervon të drejtën për të vendosur sanksione personale dhe specifike në përgjigje të ndryshimeve në situatën e sigurisë në Republika Srpska.
