Instituti Demokratik i Kosovës nëpërmjet një komunikate për media ka reaguar për mosfunksionimin e platformës e-Prokurimi për të tretën ditë radhazi.
Sipas KDI-së, mosfunksionimi i kësaj platforme përkthehet në vonesa të konsiderueshme në prokurim, pasiguri për operatorët ekonomikë dhe kufizim të qasjes në të dhëna për publikun dhe institucionet mbikëqyrëse.
“Ky problem thekson nevojën që sistemet digjitale kritike të trajtohen me prioritet të lartë në nivel shtetëror, për të siguruar funksionimin e qëndrueshëm, sigurinë kibernetike dhe mbështetjen e duhur teknike. Përkundër mbështetjes financiare për mirëmbajtjen dhe zhvillimin e platformës, sfidë e vazhdueshme mbetet mungesa e burimeve njerëzore të specializuara në fushën e teknologjisë së informacionit (TI) brenda KRPP-së. Pagat jokompetitive dhe vështirësitë në rekrutimin dhe mbajtjen e ekspertëve të TI-së kanë ndikuar që kapacitetet teknike të institucionit të mbeten të kufizuara, duke rrezikuar mirëmbajtjen dhe zhvillimin afatgjatë të sistemit”, thuhet në komunikatë për media.
KDI i ka bërë më tej thirrje Qeverisë që të rrisë vëmendjen për infrastrukturën digjitale si dhe hapa konkret për fuqizim të kapaciteteve profesionale të teknologjisë informative brenda institucioneve dhe zhvillimin e një strategjie që garanton funksionim.
“Garantimi i stabilitetit dhe funksionalitetit të infrastrukturës dixhitale nuk është vetëm një çështje teknike, por një domosdoshmëri për integritetin dhe efikasitetin e administrimit të fondeve publike. Pa një angazhim të shtuar për këtë sektor, rrezikohet jo vetëm transparenca dhe konkurrenca e ndershme në prokurimin publik, por edhe besimi i qytetarëve dhe bizneseve në institucionet shtetërore”, thuhet tutje në reagimin e KDI-së.
