Kryeministrja italiane Giorgia Meloni ka propozuar shtrirjen e mbrojtjes së NATO-s në Ukrainë pa u anëtarësuar në aleancë.
Bëhet fjalë për nenin e pestë të kartës së NATO-s , sipas të cilit një sulm ndaj një vendi të aleancës konsiderohet një sulm ndaj të gjithëve dhe, për rrjedhojë, mbrojtje kolektive.
“Nuk është njësoj si anëtarësimi në NATO, por ka të bëjë me shtrirjen në Ukrainë të së njëjtës ombrellë sigurie që kanë vendet e NATO-s. Kjo do të siguronte garanci të qëndrueshme, afatgjata dhe reale të sigurisë – më shumë se disa nga propozimet që po shoh tani,” tha Meloni në margjinat e samitit të mbrojtjes të BE-së, i cili u zhvillua dje, 6 mars, në Bruksel ( RBC -Ukraine).
Meloni sqaroi se propozimi është duke u diskutuar. “Nuk ka ende afate specifike, por shoh interesim të madh për këtë ide nga ana e bashkëbiseduesve”, shtoi ajo. Nevojiten më shumë zgjidhje afatgjata sesa dërgimi i trupave paqeruajtëse evropiane në Ukrainë, tha Meloni.
