Ministri i Mborjtjes, Ejup Maqedonci, mori pjesë në ceremoninë e certifikimit të njëmbëdhjetë oficerëve të FSK-së, të cilët me sukses përfunduan ‘Kursin e Karrierës për Kapiten’, të organizuar për herë të parë në ‘Shkollën e Oficerëve’, që funksionon në kuadër të ‘Akademisë së Mbrojtjes të Komandës së Doktrinës dhe Stërvitjes’.
Ministri Maqedonci, përmes një shkrimi në ‘Facebook’, u shpreh krenar dhe i nderuar, derisa po rikujtohej sakrifica e familjes së komandantit legjendar, Adem Jashari, të merrte pjesë në ceremoninë e certifikimit të 11 oficerëve të FSK-së.
Ai tha se dikur dukej e pamundur të arrihej një nivel i tillë i organizimit të kurseve për zhvillimin e karrierës brenda FSK-së sot, siç u shpreh ai, me vendosmërinë e gjenerallejtënant Bashkim Jashari dhe punën e palodhshme të stafit të Komandës së Doktrinës dhe Stërvitjes, një gjë e tillë u realizua.
“Kursi i Karrierës për Kapiten është kursi më i rëndësishëm për formësimin ushtarak individual të secilit pjesëtar të FSK-së, ndërsa qëllimi i Kursit të Karrierës për Kapiten është që të zhvillojë njohuri në Procesin e Vendimmarrjes Ushtarake për udhëheqje në nivel kompanie në mjedise operacionale duke u përqendruar në aftësitë taktike, teknike dhe të udhëheqjes. Kursi është i dizajnuar të përgatit oficer të aftë në udhëheqje, ekspertizë taktike dhe operative, njohuri për degë specialistike, operacione të përbashkëta, si dhe ekspertizë si oficer shtabi, duke përmbushur kështu qëllimin dhe objektivat e Forcës së Sigurisë së Kosovës për ngritjen e kapaciteteve të Komandës së Doktrinës dhe Stërvitjes”, ka shkruar Maqedonci.
