Donald Trump, Presidenti i Shteteve të Bashkuara, mblodhi kabinetin e tij dhe ua bëri të qartë atyre se ata janë drejtuesit e departamenteve të tyre dhe se Elon Musk nuk ka të drejtë të pushojë punëtorët, raportoi Politico.
Siç ka bërë me dije një burim nga takimi për këtë media, Trump u ka thënë bashkëpunëtorëve të tij se Musk mund të sugjeronte se çfarë mund të bënin, por se vendimi i tyre ishte detyrues.
Në këtë takim mori pjesë edhe një miliarder, roli i të cilit në ekipin e Trump ka ngritur shqetësime te anëtarët e tjerë të administratës, veçanërisht për shkak të publicitetit negativ mediatik lidhur me deklaratat dhe postimet e tij në rrjetet sociale.
Musk, sipas Politico, pranoi vendimin e presidentit amerikan dhe tha se “Departamenti i tij i Efikasitetit të Qeverisë bëri disa gabime”.
Trump theksoi gjithashtu se ai “nuk mbështet pushimet masive në administratën qeveritare” dhe se ai “dëshiron të mbajë punëtorë të mirë”.
Pavarësisht këtyre mesazheve, një numër i madh i punëtorëve në burokracinë amerikane janë pushuar nga puna në ditët e fundit dhe disa ekspertë juridikë kanë theksuar se “ligjshmëria” e këtyre vendimeve është e dyshimtë.
Nuk dihet nëse “ndryshimi i kursit” që sinjalizoi Trump në këtë takim do të rezultojë në kthimin e disa punëtorëve në vendet e tyre të punës.
Sipas Politico, ky takim u thirr pasi republikanët e rangut të lartë i thanë Trump dyshimet e tyre për veprimet e departamentit joformal të Musk dhe se ai “duhet të kthejë besimin” tek bashkëpunëtorët që drejtojnë departamente të ndryshme në qeverinë amerikane.
