Ministri i Jashtëm italian Antonio Tajani shprehu shqetësimin për veprimet e presidentit të Republikës Srpska, Milorad Dodik, të cilat sipas tij, mund të kërcënojnë stabilitetin e Bosnjë-Hercegovinës.
“Veprimet e Presidentit të Republikës Srpska Dodik rrezikojnë të minojnë stabilitetin e Bosnje-Hercegovinës dhe rajonit. Ne u bëjmë thirrje autoriteteve në BiH që të angazhohen në dialog dhe të shmangin përshkallëzimin që çon në situata krize. Ne vazhdojmë të punojmë, gjithashtu falë pranisë së kontingjentit tonë ushtarak, për stabilitetin e Bosnje-Hercegovinës”, thanë Tanji.
Për kujtesë, disa ditë më parë, Dodik nënshkroi ligje që ndalojnë veprimtarinë e Gjykatës dhe Prokurorisë së BiH, Agjencisë Shtetërore të Hetimit dhe Mbrojtjes (SIPA) dhe Këshillit të Lartë Gjyqësor dhe Prokurorial të BiH në territorin e Republikës Srpska.
Këto ligje u miratuan në një seancë të posaçme të Asamblesë Kombëtare të RS më 27 shkurt dhe pas nënshkrimit u botuan në Gazetën Zyrtare të Republikës Srpska.
Megjithatë, Gjykata Kushtetuese e BeH vendosi dje që këto ligje të pezullohen përkohësisht, gjë që shkaktoi reagimin e Dodik.
Dodik më parë ka lavdëruar shpesh presidentin amerikan Donald Trump, por administrata e tij e ka bërë të qartë se nuk do të tolerojë lëvizjet që kërcënojnë stabilitetin e Bosnjë-Hercegovinës. Retorika dhe veprimet e Dodik, të cilat shpesh kanë qenë në kundërshtim me kuadrin kushtetues të BiH, po përballen tani me reagime gjithnjë e më të ashpra nga komuniteti ndërkombëtar, veçanërisht nga Shtetet e Bashkuara.
