Kancelari i ri i Gjermanisë, Friedrich Merz, ka thënë se do të dëshironte bisedime me Francën dhe Britaninë për ndarjen e arsenalit të tyre bërthamor, por jo si një zëvendësim për mbrojtjen bërthamore të SHBA për Evropën.
“Ndarja e armëve bërthamore është një temë për të cilën duhet të flasim… Ne duhet të forcojmë së bashku mbrojtjen bërthamore.” Merz tha të dielën në një intervistë për radio Deutschlandfunk.
Ai theksoi se këto bisedime duhet të jenë një shtesë e ombrellës bërthamore të SHBA-së, jo një zëvendësim i saj.
“Ne duhet të bisedojmë me të dyja vendet (Francën dhe Britaninë e Madhe), gjithmonë nga perspektiva e plotësimit të mbrojtjes bërthamore amerikane, të cilën natyrisht duam ta ruajmë”.
Gjermania merr pjesë në ndarjen e armëve bërthamore të NATO-s, por nuk ka të sajat.
Për arsye historike, Gjermania është e angazhuar për mbrojtjen jo-bërthamore përmes një sërë marrëveshjesh ndërkombëtare, por ajo merr pjesë në programin e shkëmbimit të armëve bërthamore të NATO-s, ku kokat amerikane mund të vendosen në territorin e saj.
Evropa rrit shpenzimet e mbrojtjes për shkak të frikës nga Rusia
Në një takim të liderëve të BE-së në Bruksel të enjten, udhëheqësit mbështetën një rritje të shpenzimeve të mbrojtjes mes shqetësimeve se Rusia, e inkurajuar nga lufta në Ukrainë, mund të sulmojë një nga vendet anëtare të BE-së.
Ekziston gjithashtu një pasiguri në rritje rreth mbështetjes te SHBA-ja si garantuesi kryesor i sigurisë së Evropës.
Macron: Franca mund të zgjerojë mbrojtjen bërthamore, por vendimi mbetet në duart e Francës
Presidenti francez Emmanuel Macron iu drejtua kombit të mërkurën në mbrëmje, duke paralajmëruar se agresioni rus “nuk njeh kufij”.
Ai njoftoi se do të diskutonte me partnerët e tij evropianë mundësinë e zgjerimit të mbrojtjes bërthamore franceze në vendet e tjera të kontinentit, por bëri të qartë se vendimi dhe kontrolli do të mbeten gjithmonë në duart e presidentit francez.
