Praktika të publikimit të fotografive shërbimin inteligjent pa zbuluar identitetin ka pas edhe më herët në Kosovë, fotoja e Presidentes me lejen dhe vlerësimin e AKI-së. Kështu ka thënë këshilltari i presidentes, Bekim Kupina.
Dje presidentja e vendit, Vjosa Osmani, për nder të Ditës Ndërkombëtare të Gruas, ka vizituar punëtoret gra të Agjencisë së Inteligjencës së Kosovës dhe me to kishte bërë një foto ku atyre u shihet vetëm fytyra, të cilën e ka postuar edhe në rrjete sociale, për çka presidentja është sulmuar në disa media.
“Publikimi i fotos së Presidentes me gratë e inteligjencës ka pasur për qëllim të vlerësojë punën dhe përkushtimin e tyre në shërbim të sigurisë kombëtare. Në këtë foto, identiteti i tyre nuk ekspozohet dhe nuk cenohet asnjë standard i sigurisë. Për më tepër, kjo foto është bërë dhe dërguar nga AKI-ja dhe pas vlerësimit të tyre se nuk përbën ekspozim të identitetit”, ka thënë për RTKlive këshilltari i presidentes, Bekim Kupina.
Ai thotë se praktika të tilla ka pasur edhe më herët në Kosovë dhe në shtete të tjera.
“Presidenca vazhdon të mbetet e përkushtuar ndaj ruajtjes së standardeve më të larta të konfidencialitetit dhe profesionalizmit. Është për të ardhur keq që pikërisht në Ditën Ndërkombëtare të Gruas, në vend që të vlerësohet roli dhe kontributi i grave në një fushë sfiduese si inteligjenca, po bëhet fushatë me komente fyese dhe të padrejta ndaj tyre. Gratë që shërbejnë me përkushtim në sigurinë kombëtare meritojnë respekt dhe mbështetje, jo paragjykime”, ka thënë këshilltari Kupina.
