Sulmet hibride ruse po bëhen më të shpeshta dhe më agresive në të gjithë Evropën. Një raport i ri investigativ zbulon strategjitë dhe aktorët pas këtyre operacioneve.
Një raport i ri nga Rrjeti i Gazetarisë Investigative të EBU-së zbulon përmasat e sulmeve hibride ruse në Evropë, duke përfshirë përdorimin e ‘agjentëve të disponueshëm’ të rekrutuar përmes mediave sociale. Këta individë janë angazhuar në sulme kibernetike, zjarrvënie, vandalizëm, sabotazh dhe fushata ndikimi gjatë zgjedhjeve në shtete të ndryshme evropiane.
Hetimi evidenton mbi 60 operacione të konfirmuara ose të dyshuara si vepra të operativëve rusë, të cilat synojnë jo vetëm dëmtime fizike, por edhe krijimin e konfuzionit, frikës dhe mosbesimit te publiku. Bazuar në intervista me 20 zyrtarë të qeverisë, inteligjencës dhe ushtrisë nga nëntë vende, raporti tregon një përshkallëzim të këtyre sulmeve, të cilat po bëhen gjithnjë e më të guximshme dhe të shpeshta.
Përfaqësuesja e Lartë e BE-së për Punët e Jashtme dhe Sigurinë, Kaja Kallas, thekson rëndësinë e këtij kërcënimi: “Kjo është lufta që zhvillohet në hije. Duhet ta kuptojmë se këto sulme nuk prekin vetëm vendet kufitare me Rusinë, por gjithë Evropën.” Për pesë muaj, gazetarët investigativë të EBU-së dhe të nëntë mediave publike partnere analizuan rreth 80 incidente të lidhura me aktorë rusë që nga fillimi i vitit 2024. Në këtë studim nuk janë përfshirë rastet e spiunazhit tradicional nga agjentë të trajnuar apo raportime nga burime të paqarta.
Doktrina sovjetike e luftës hibride është përshtatur në epokën digjitale. Me një numër të reduktuar agjentësh me përvojë në terren, Rusia po mbështetet gjithnjë e më shumë te operativët me nivel të ulët, të rekrutuar dhe udhëzuar përmes internetit. Objektivat e këtyre sulmeve përfshijnë sabotimin e infrastrukturës civile dhe ushtarake, vandalizmin, zjarrvënien, sulmet kibernetike dhe fushatat endikimit, duke përfshirë ndërhyrjet zgjedhore.
Raporti përfshin mbi 20 intervista me zyrtarë të qeverisë, sigurisë dhe ushtrisë, të realizuara nga gazetarë të 10 mediave anëtare të EBU-së.
