Presidenti amerikan Donald Trump ka paralajmëruar se SHBA-ja mund të ndërmarrë veprime që do të ishin “shkatërruese për Rusinë” nëse Moska nuk arrin një marrëveshje me Ukrainën.
Të mërkurën, një ditë pasi Kievi mbështeti një plan armëpushimi të SHBA-së për Ukrainën, Presidenti Trump bëri një nga deklaratat e tij më të ashpra deri më tani për Rusinë.
“Financiarisht, ne mund të ndërmarrim veprime që do të kenë pasoja të këqija për Rusinë, që do të jenë shkatërruese për Rusinë”, paralajmëroi Donald Trump, duke theksuar se ai nuk dëshiron të përdorë masa të tilla sepse dëshiron paqe.
Paralajmërimi erdhi gjatë një takimi mes Donald Trump dhe kryeministrit irlandez Micheal Martin. I pyetur nëse do të ishte i gatshëm t’i bënte presion Vladimir Putinit për të rënë dakord për një armëpushim me Ukrainën, Presidenti Trump tha po: “Po, ne mundemi. Por shpresoj se nuk do të jetë e nevojshme.”
Marrëveshja e armëpushimit u arrit të martën gjatë bisedimeve midis delegacioneve amerikane dhe ukrainase në Arabinë Saudite. Shtëpia e Bardhë tha se i dërguari special i Presidentit Trump, Steve Witkoff do të udhëtojë në Moskë këtë javë për të diskutuar propozimet. Shtetet e Bashkuara do të gjykojnë synimet e Kremlinit nga reagimi i tyre ndaj marrëveshjes SHBA-Ukrainë, tha Sekretari i Shtetit Marco Rubio.
“Nëse ata thonë po, ne do të dimë se kemi bërë përparim dhe se ka një shans real për paqe. Nëse ata thonë jo, qëllimet e tyre do të jenë të qarta,” tha sekretari Rubio.
