Hysen Durmishi, Zëvendësministër në Ministrinë e Mjedisit Planifikimit Hapësinor dhe Infrastrukturës, ka reaguar për vendimin e Kryetarit të Prishtinës, Perparim Rama, për transportin, e që sipas tij është në kundërshtim me ligjin dhe se gjatë ditës Ministria ka kërkuar që urgjentisht të shfuqizohet ky vendim.
Durmishi ka thënë se Ministria pret që Komuna e Prishtinës të reflektoj dhe të shfuqizoj këtë vendim deri të hënën.
Sipas tij nëse kjo nuk ndodh atëherë do të veprojnë në bazë të përgjegjësive e kompetencave ligjore që i kanë.
Ai përmes një shkrimi në Facebook, tutje është shprehur se Komuna e Prishtinës nuk ka ende plan të transportit të aprovuar e cili më pastaj do të duhej të dërgohej në ministri që të konstatohej ligjshmëria e tij.
Durmishi po ashtu ka thënë se Komuna nuk kanë as rregullore të transportit të miratuar, duke cekur se ky është obligim ligjor dhe çfarëdo plani i transportit nuk duhet që të afektoj linjat ndërurbane.
“Transportuesit e udhëtarëve me autobus për linjat ndërurbane të relacionit Prishtinë – Podujevë dhe anasjelltas veprojnë sipas rendit të udhëtimit të miratuar nga ministria dhe këtë nuk mund ta ndryshoj as Komuna e Prishtinës e as ndonjë Komunë tjetër në Kosovë. Një gjë të tillë mund ta bëjmë vetëm ne si ministri”, ka shkruar Durmishi.
Tutje Durmishi thekson se personalisht i ka pritur në takim zyrtarë të lartë të komunës dhe këshilltarë të kryetarit ku thekson se ju kanë shpjeguar për hapat që duhet të ndërmarrë komuna dhe për mundësinë e një marrëveshje në mes komunës së Prishtinës dhe asaj të Podujevës për rregullimin reciprok të transportit urban dhe urbanoperiferik. Por, sipas tij në vend që të vazhdohej kjo rrugë e zgjidhjes kanë marrë një email nga zyrtarë të Komunës së Prishtinës për një vendim të kundërligjshëm të kryetarit Përparim Rama.
