Udhëheqësi de facto i Arabisë Saudite i tha presidentit rus, Vladimir Putin, se shteti i tij mbështet “të gjitha nismat” për përfundimin e luftës në Ukrainë.
Njoftimi i lëshuar më 14 mars vjen pasi gjatë bisedimeve në Xhedah të Arabisë Saudite, Ukraina pranoi një plan të Shteteve të Bashkuara për një armëpushim 30-ditor.
Putin më 13 mars tha se e pranon në parim këtë propozim, por shtoi se ka hollësi të cilat duhet të zgjidhen, si për shembull furnizimi i Kievit me armë perëndimore.
Princi saudit i Kurorës, Mohammed bin Salman, riafirmoi “përkushtimin e Arabisë Saudite për të lehtësuar dialogun dhe për të mbështetur të gjitha nismat që synojnë arritjen e një zgjidhjeje politike”, tha Ministria e Jashtme saudite, pasi bin Salman zhvilloi një bisedë telefonike me Putinin.
Pas pranimit të propozimit amerikan nga Ukraina, Uashingtoni rinisi dërgimin e armëve për Kievin dhe rinisi ndarjen e informacioneve të inteligjencës me Ukrainën, që u pezulluan pas përplasjes që pati presidenti ukrainas, Volodymyr Zelensky, me atë amerikan, Donald Trump, në Shtëpinë e Bardhë më 28 shkurt.
Sekretari amerikan i Shtetit, Marco Rubio, pas bisedimeve në Xhedah deklaroi se “tani topi është në fushën e Rusisë”.
Sipas deklaratës të lëshuar nga Kremlini, Putini i tha princit saudit se ai “theksoi rëndësinë e zgjidhjes së krizës në Ukrainë dhe shprehu gatishmërinë që të vazhdojë të kontribuojë në çdo mënyrë të mundshme për të normalizuar raportet ruso-amerikane”.
Arabia Saudite ka qenë mikpritëse e bisedimeve mes Rubios dhe homologut të tij rus, Sergei Lavrov, muajin e kaluar, takim në të cilin zyrtarët u pajtuan për të krijuar ekipe për të negociuar për rrugën drejt përfundimit të luftës që Rusia nisi kundër Ukrainës tre vjet më parë.REL
