Lideri i Partisë Demokratike e Kosovës, Memli Krasniqi, i falënderoi qytetarët që i dhanë votë partisë që ai drejton, PDK-së.
“Faleminderit! Kjo është fjala e parë dhe më e sinqertë që e ndjej t’ua them pas përfundimit të numërimit të votave. Faleminderit për besimin e rreth 200 mijë qytetarëve që na mbështetën në zgjedhjet e 9 shkurtit”, ka shkruar Krasniqi menjëherë pasi KQZ-ja shpalli rezultatet përfundimtare të zgjedhjeve.
Krasniqi tha se në këto zgjedhje u rritën për 50 mijë vota më shumë, krahasuar me zgjedhjet e fundit, një rezultat që e quajti historik.
“Ky është një vlerësim për punën tonë, përkushtimin tuaj dhe besimin se Kosova mundet më mirë. Por, a është ky maksimumi ynë? Jo! A mundemi më shumë? Patjetër! Tani nis akti tjetër – ku me të njëjtën energji dhe përkushtim, ecim përpara! Pas fitores sonë në zgjedhjet lokale, ky është një tjetër hap drejt rikthimit të madh”, shkroi ai tutje.
Lideri i PDK-së që doli i dyti nga këto zgjedhje ka falënderuar qytetarët për një proces demokratik shembullor.
“Megjithatë, mbetet e domosdoshme puna e vazhdueshme për të garantuar çdo votë dhe për të eliminuar çdo dyshim që ende mund të ekzistojë”, vijoi ai.
Tutje, Krasniqi tha se Kosova ka shumë nevojë për qartësi, stabilitet dhe zhvillim.
“Ka nevojë për një qeveri të përgjegjshme sa më shpejt, sepse ka nevojë për shpresë dhe besim. Ka nevojë për miq, partnerë dhe aleatë – sepse asnjëherë, e veçanërisht sot, koha nuk pret për ata që hezitojnë. Prandaj, çdo parti që ka marrë votën e qytetarëve duhet ta përkthejë atë në veprim, duke e vënë në shërbim të interesit qytetar”, tha Krasniqi.
