Futbollisti i Shkupit, Andrej Lazarov, është një nga viktimat e tragjedisë në Koçan.
Lojtari ka humbur jetën nga plagët e marra pas zjarrit që shpërtheu gjatë natës në një klub nate, ku kanë humbur jetën rreth pesëdhjetë persona e dhjetëra të tjerë të lënduar janë duke u trajtuar.
Lajmin e hidhur e ka konfirmuar vetë klubi i Shkupit përmes një njoftimi në Facebook:
“Me dhimbje të thellë dhe pikëllim të madh, njoftojmë se futbollisti ynë, Andrej Lazarov, është konfirmuar mes viktimave të zjarrit tragjik që ndodhi gjatë natës në Koçan.
Si një shpirt hero që ishte, Lazarov humbi jetën duke u përpjekur të ndihmojë të tjerët të shpëtojnë nga ambienti i kapluar nga zjarri. Ai u helmua nga tymi gjatë përpjekjeve të tij për të shpëtuar jetë, duke treguar guxim dhe humanizëm deri në momentin e fundit. Veprimi i tij heroik do të mbetet gjithmonë në kujtesën tonë, si një dëshmi e karakterit të tij fisnik dhe zemrës së tij të madhe.
Kjo është një humbje e madhe për klubin tonë, për shokët e ekipit dhe për gjithë komunitetin e futbollit. Fjalët janë të pakta për të përshkruar dhimbjen që ndjejmë në këto momente, në këtë tragjedi prej më të mëdhave në histori që e ka kapluar klubin tonë!
FC Shkupi i shpreh ngushëllimet më të sinqerta familjes së tij, të afërmve dhe gjithë familjes së madhe të klubit tonë.
Andrej ishte vetëm gjashtë muaj pjesë e Shkupit, por emri i tij do të mbetet i pashlyeshëm gjithmonë si pjesë e skuadrës sonë. Kujtimi për të do të mbetet gjithmonë i paharruar në zemrat tona.”
Lazarov gjatë gjithë karrierës së tij ka luajtur për Metalurgun, Rabotniçkin, Tikveshin, Rudesin, Goricën dhe Shkupin.
