Drejtoresha e spitalit të Koçanit, Dr. Kristina Serafimova, sapo deklaroi në një konferencë për media se të vrarët nga zjarri i diskotekës mbrëmë janë nga Shkupi, Shtipi, Probishtipi dhe Koçani.
– Kemi marrë 70 veta, për fat të keq disa prej tyre kanë vdekur. Pacientët kanë pësuar djegie dhe helmim me monoksid karboni. Pas kësaj ata janë transferuar në Spitalin klinik në Shtip, dhe prej andej disa janë dërguar në Shkup. Aktualisht kemi 20 pacientë me simptoma të lehta. Shumë kanë humbur jetën, por deri në përfundimin e identifikimit nuk mund të bëjmë të ditur numrin e saktë të të vdekurve. Identifikimi i disa trupave ishte i vështirë për shkak se disa prej viktimave nuk kishin karta identiteti. Të vdekurit ishin të moshës nga 14 deri në 24 vjeç, tha drejtoresha e spitalit të Koçanit, dr. Kristina Serafimova.
Kujtojmë se të paktën 50 persona kanë humbur jetën nga zjarri që shpërtheu natën e së shtunës dhe të dielës në diskotekën Puls në Koçan. Në momentin e zjarrit po performonte grupi DNK. Të paktën 100 persona janë lënduar dhe janë dërguar në spitalet në Koçan, Shtip dhe Shkup. Mes tyre ka edhe anëtarë të një grupi të njohur.
Në momentin e zjarrit në diskotekë ndodheshin të paktën 1500 persona. Pamjet që qarkullojnë në internet tregojnë mysafirët e diskotekës duke u argëtuar, ndërsa spërkatës janë aktivizuar pranë skenës. Në një moment, spërkatësit goditën tavanin dhe momenti u kap pasi tavani filloi të digjej. Të ftuarit në panik u përpoqën të shuanin zjarrin, i cili filloi të përfshijë me shpejtësi rrufeje çatinë.
Më pas në vendngjarje mbërritën ekipet e zjarrfikëses, policisë dhe ambulancës, por nuk kishte mjaft ambulanca për të transportuar menjëherë të gjithë të plagosurit në spital. Dëshmitarët thonë se skenat ishin jashtëzakonisht tronditëse.
Shumë nga të plagosurit janë transportuar me helikopter në Shkup, ku mjekët po luftojnë për jetën e tyre. Sipas informacioneve jozyrtare, të paktën 25 persona kanë pësuar djegie shumë të rënda.
Pak para orës 10, policia njoftoi se 51 persona kanë mbetur të vrarë dhe të paktën 100 të plagosur, si dhe janë bërë arrestimet e para.
