Pas zjarrit tragjik në diskotekën “Puls” në Koçan, ku humbën jetën 59 persona, qytetarët e këtij qyteti maqedonas e shprehën zemërimin e tyre në rrugë. Ata kanë shembur sot kafenenë “Klasik”, e cila është e DJ-së, pronarit të diskotekës së lartpërmendur
Qytetarët e mbledhur fillimisht kanë gjuajtur me gurë kafenenë, e më pas kanë shkatërruar inventarin me këmbë dhe sende të tjera. Dyert dhe dritaret e godinës janë thyer, ndërsa karriget dhe tavolinat kanë përfunduar në rrugë. Forcat e policisë kanë qenë të pranishme në vendngjarje, por nuk kanë ndërhyrë drejtpërdrejt për të parandaluar prishjen e lokalit.
Sulm në shtëpinë e pronarit të diskotekës
Pasi kanë shkatërruar kafenenë, një grup qytetarësh janë drejtuar drejt shtëpisë së pronarit të diskotekës, ku kanë tentuar të çajnë kordonin e policisë. Në atë moment, një grua nga turma bërtiti:
“Lërini fëmijët, le të gjykojnë autorin, ky nuk është faji i shtetit, ky është faji i një njeriu me emër dhe mbiemër”.
Leje diskoteke e falsifikuar
Siç raportuan më parë mediat maqedonase, nga hetimet rezultoi se diskoteka “Puls” ku shpërtheu zjarri, funksiononte me leje të falsifikuar të kabaresë.
Kryeministri Hristijan Mickoski konfirmoi se leja është lëshuar nga ministria me vulë origjinale, por në librat zyrtarë me atë numër është regjistruar dokumentacion krejtësisht tjetër.
Qytetarët e Koçanit, si duket të pakënaqur nga reagimi i institucioneve dhe përgjegjësia e pushtetit, vendosën ta marrin drejtësinë në duart e tyre, gjë që solli edhe skena të dhunshme në këtë qytet maqedonas.
.
