Një aeroplan u rrëzua pranë bregut të Karaibeve të Hondurasit mbrëmë, disa minuta pasi u ngrit nga ishulli Roatan, duke vrarë shtatë persona, ndërsa 10 u nxorën të gjallë nga rrënojat, thanë autoritetet.
Avioni Jetstream i linjës ajrore Honduras Lanhsa mbante 14 pasagjerë dhe tre anëtarë të ekuipazhit, tha ministri i transportit i vendit, duke shtuar se rrënojat u gjetën një kilometër larg bregut të ishullit. Sipas një regjistri fluturimi të treguar nga mediat lokale, pasagjerët përfshinin një shtetas amerikan, një shtetas francez dhe dy të mitur. Avioni ishte planifikuar të fluturonte për në aeroportin La Ceiba në kontinentin e Hondurasit.
Shefi i Zjarrfikësve të Roatan Franklin Borjas konfirmoi numrin e të vdekurve. Sipas shërbimeve zjarrfikëse, mes viktimave ishte edhe muzikanti i famshëm honduras Aurelio Martinez Suazo.
“Qasja në vendin e aksidentit është e vështirë”
Pamjet dramatike të postuara në mediat sociale nga policia kombëtare treguan oficerë dhe shpëtimtarë të tjerë që transportonin të mbijetuarit në bregun shkëmbor, disa me barela, ndërsa një varkë aty pranë ndriçonte zonën në errësirë. Shkaku i rrëzimit nuk ishte i qartë menjëherë dhe linja ajrore nuk iu përgjigj një kërkese për koment.
Borjas i tha Reuters se të mbijetuarit u dërguan në një spital aty pranë dhe gjithashtu konfirmoi se aksidenti ndodhi pak pasi avioni u ngrit nga ishulli. Roatan, më i madhi nga ishujt e Gjirit në brigjet e Hondurasit, është një destinacion popullor turistik i njohur për shkëmbinjtë e tij koralorë të gjallë.
Borjas theksoi se kushtet e pafavorshme e vështirësuan operacionin e kërkim-shpëtimit. “Qasja në vendin e aksidentit është e vështirë sepse aty ka 30 metra gurë dhe nuk mund të arrish as duke ecur e as duke notuar. Zhytësit që marrin pjesë në shpëtim nuk kanë dukshmëri”, tha ai.
