Ministri kroat i Mbrojtjes, Ivan Anushiq, i është përgjigjur reagimit të Ministrisë së Jashtme të Serbisë për nënshkrimin e deklaratës që forcon bashkëpunimin trepalësh në fushën e mbrojtjes ndërmjet Kroacisë, Kosovës dhe Shqipërisë së arritur dje në Tiranë, ku pati deklaruar se “nuk do ta pranojë në heshtje”.
Ministri Anushiq, përmes platformës ‘X’, ka shkruar se ka kaluar koha kur Kroacia e pyeste Beogradin se çfarë i lejohej të bënte dhe si duhet ta bënte, dhe kjo nuk do të ndodhë më kurrë.
“Kemi 35 vjet që jemi shtet i pavarur, kemi kaluar pesë vite agresion dhe politikë që mbrojti një narrativë të tillë. Kroacia do të nënshkruajë deklarata me kë të dojë dhe bashkëpunimi me Shqipërinë dhe Kosovën është i fokusuar në shkëmbimin e njohurive, bashkëpunimin ndërmjet industrive ushtarake, mbështetjen për rrugën euroatlantike të Shqipërisë dhe Kosovës…”, ka shkruar Anushiq.
