Imamoglu flet pasi iu anulua diploma dhe u urdhërua paraburgimi

Kryetari i bashkisë së Stambollit Ekrem Imamoglu, i cili është lënë në paraburgim për një hetim korrupsioni, foli ndërsa dhjetëra oficerë policie të pajisura plotësisht qëndronin jashtë shtëpisë së tij.

“Me keqardhje them se një grusht njerëzish që përpiqeshin të vidhnin vullnetin e popullit dërguan policinë e dashur, forcat e sigurisë, duke i implikuar në këtë akt të paligjshëm. Qindra policë u dërguan në derën e shtëpisë sime – shtëpisë së 16 milionë banorëve të Stambollit”, tha Imamoglu.

Lëvizja për të arrestuar kryebashkiakun e qytetit më të madh të Turqisë, një fushë beteje kryesore politike, erdhi pasi Universiteti i Stambollit tha të martën se kishte anuluar diplomën e Imamoglut për parregullsi, duke i dhënë një goditje opozitës disa ditë përpara se ajo të zgjidhte atë si kandidatin e saj presidencial në zgjedhjet e ardhshme.

Pa një diplomë universitare, Imamoglu nga opozita kryesore CHP nuk mund të jetë kandidat për president të Turqisë.

Imamoglu tha se vendimi i universitetit ishte i paligjshëm dhe jashtë juridiksionit të tij dhe se ai do të nisë një sfidë ligjore.

“Janë afër ditët kur ata që morën këtë vendim do të mbajnë përgjegjësi para historisë dhe drejtësisë”, tha ai.

Guvernatoria e Stambollit njoftoi mëngjesin e sotëm se të gjitha llojet e demonstratave dhe deklaratave publike janë ndaluar për katër ditë nga data 19 deri më 23 mars për të ruajtur rendin publik në të gjithë qytetin dhe për të parandaluar çdo veprim provokues që mund të pasojë.

Në një deklaratë të Kryeprokurorit të Shtetit thuhet se nëpër degë janë zbuluar tenderë të paligjshëm dhe ryshfet, transmeton CNN Turk.

Imamoglu u zgjodh kryebashkiak i qytetit më të madh dhe më të populluar të Turqisë në vitin 2019. Zgjedhjet e ardhshme presidenciale janë planifikuar për në vitin 2028, por zgjedhjet e parakohshme janë të mundshme.