Presidenti serb Aleksandar Vuçiq tha sonte se nënshkrimi i memorandumit mes Shqipërisë, Kosoves dhe Kroacia për bashkëpunimin në fushën e mbrojtjes paraqet shkelje të marrëveshjes nënrajonale dhe shtoi se është pothuajse i sigurt se NATO-ja as që ishte e informuar për këtë.
Vuçiq, duke iu përgjigjur pyetjes së një gazetari pas takimit me Sekretarin e Përgjithshëm të NATO-s, Mark Rutte, nëse kishte folur me të për këtë dhe nëse Serbia do të merrte shpjegimin që kishte kërkuar, tha se kjo ishte një nga temat e bisedës që ai kishte ngritur.
“Kjo është shkelje e të ashtuquajturës marrëveshje nënrajonale për kontrollin e armëve nga viti 1996, por ne kemi parë nga reagimet e Kroacisë dhe disa pjesëve të tjera të rajonit se ata nuk janë shumë të interesuar për të. Jam pothuajse i bindur se NATO-ja as që ishte e informuar dhe se as që u është thënë se cilat marrëveshje janë shkelur”, tha Vuçiq.
Ai shtoi se nuk mendon se Prishtina, Zagrebi apo Tirana do të shqetësohen për këtë.
“Është gjithashtu detyra jonë t’i theksojmë zotit Rutte dhe njerëzve në NATO dhe gjithë të tjerëve se kjo është një shkelje e asaj që është pranuar, nënshkruar dhe respektuar që nga viti 1996. Është detyra jonë të kuptojmë realitetin dhe të përgatitemi për të ardhmen në përputhje me rrethanat,” tha ai.
