Me rastin e shënimit të 26-vjetorit të rënies heroike të profesorit të Historisë, Selim Berisha, kryeministri në detyrë i Kosovës, Albin Kurti, i shoqëruar nga ministri i Shëndetësisë, Arben Vitia, sot bëri homazhe dhe vendosi kurora me lule të freskëta pranë varrit të profesor Selim Berishës, në varrezat e fshatit Barilevë-Drenoc, të Prishtinës.
Sipas njoftimit nga ekzekutivi, në përkujtim të figurës së shquar të profesorit Berisha, Kurti tha se edhe pse jemi me pikëllim dhe dhembje që prof. Berisha nuk është në mesin tonë fizikisht, është nder e krenari të kujtojmë jetën, veprën dhe rënien heroike të tij.
“Si profesor i historisë u bë edhe vetë pjesë e historisë së popullit tonë, me rezistencën e qëndresën e tij, në një luftë të pabarabartë, në një betejë në të cilën dha gjithçka nga vetja e tij me armë në dorë, duke u përballur me forcat armike të Serbisë që po bënin krime e mizori ndaj popullsisë civile”, u shpreh Kurti.
Ai shtoi se gjaku i dëshmorëve dhe i martirëve janë themelet e shtetit të Kosovës, kurse neve na përket një pjesë e punës që ka të bëjë me forcimin e shtetit, mbrojtjen e territorit, kulmin e sigurt, gardhin e tokës sonë stërgjyshore dhe se pikërisht dëshmorët dhe martirët janë ata të cilët vazhdojnë të na e ndriçojnë rrugën për këtë detyrë të shenjtë që kemi të gjithë ne bashkë dhe secili prej nesh.
“Lavdi profesor Selim Berishës dhe gjithë dëshmorëve e martirëve të kombit shqiptar”, u shpreh Kurti.
