Imazhet e reja satelitore të bazës ajrore ruse Engels, e cila u godit dje nga dronët ukrainas, janë marrë mëngjesin e sotëm, duke treguar kratere dhe ndërtesa të shkatërruara. Pamjet tregojnë një krahasim të situatës së sotme me atë të dhjetorit 2024. Pamjet janë publikuar nga kompania amerikane Maxar Technologies.
Kujtojmë, qytetet ruse të Saratov dhe Engels ishin objektivat e sulmit më të rëndë me dron në rajonin e Saratovit që nga fillimi i luftës mbrëmë, tha dje guvernatori Roman Busargin, duke shtuar se një zjarr shpërtheu në aeroport.
Të paktën katër shpërthime janë dëgjuar.
Kanalet ruse Telegram raportuan se fillimisht u shpall një sulm ajror, i ndjekur nga një seri shpërthimesh. Sipas kanalit MASH, të paktën katër shpërthime janë dëgjuar rreth orës 4 të mëngjesit me orën lokale.
Qytetet Engels dhe Saratov ndodhen pranë bazës ajrore ushtarake Engels-2, nga e cila shpesh ngrihen bombarduesit strategjikë për të kryer sulme ajrore në Ukrainë. Kanali i pavarur i lajmeve Astra raportoi shpërthime pranë bazës ajrore.
Një zjarr ka rënë në një magazinë nafte.
Kanali Telegram Shot raportoi se një zjarr kishte shpërthyer edhe në zonën e depos së naftës Engels dhe zyrtarët rusë nuk komentuan në atë kohë për dëmtimin e mundshëm të infrastrukturës së naftës.
Mbrojtja ajrore ruse rrëzoi 132 dronë ukrainas gjatë natës, duke përfshirë 54 mbi rajonin e Saratovit, 40 mbi rajonin e Voronezh, 22 mbi rajonin e Belgorodit dhe të tjerë mbi rajonet Rostov, Kursk dhe Lipetsk, si dhe mbi Krimenë e pushtuar, konfirmoi Ministria Ruse e Mbrojtjes.
