Presidenti i SHBA-së, Donald Trump, i ka hequr lejet e sigurisë ish-zëvendëspresidentes Kamala Harris, ish-sekretares së shtetit Hillary Clinton dhe të tjerëve, në masën e tij të fundit kundër kundërshtarëve demokratë.
Presidenti republikan, i cili gjithashtu revokoi lejen e sigurisë së ish-presidentit Joe Biden, mundi Clinton në zgjedhjet presidenciale të vitit 2016 dhe Harris në zgjedhjet e vitit të kaluar.
“Kam vendosur se nuk është më në interesin kombëtar që individët e mëposhtëm të kenë akses në informacionin e klasifikuar,” tha Trump në një memorandum të premten vonë, ku përfshihej edhe ish-sekretari i shtetit Antony Blinken.
Ndërsa shkarkimet mund të mos kenë një efekt të menjëhershëm, ato janë një tjetër shenjë e një ndarjeje politike në rritje në Uashington, pasi Trump kërkon hakmarrje ndaj atyre që i konsideron armiq. Memorandumi u lëshua disa orë pasi ai mbërriti në pronën e tij në Bedminster, New Jersey, për fundjavë.
Biden bëri të njëjtën gjë me Trump
Lista e presidentit amerikan përfshin gjithashtu ish-Përfaqësuesen Republikane Liz Cheney, një kritike të ashpër të Trump, ish-këshilltarin e Sigurisë Kombëtare të Shtëpisë së Bardhë, Jake Sullivan, si dhe Fiona Hill, një eksperte për Rusinë, e cila ishte në Këshillin e Sigurisë Kombëtare gjatë mandatit të tij të parë.
Mark Zaid, një avokat i sigurisë kombëtare në Uashington, i cili përfaqëson sinjalizuesit, dhe Adam Kinzinger, një ish ligjvënës republikan, por një kritik i ashpër i Trumpit, janë ndër disa të tjerë të cilëve u janë revokuar lejet e sigurisë.
Ai tashmë i ka hequr lejen e sigurisë Biden, duke i mohuar ish-presidentit aksesin tradicional në shërbimet e inteligjencës amerikane.
Ish-presidentët e SHBA-së kanë marrë tradicionalisht informime të inteligjencës në mënyrë që të mund të këshillojnë presidentët aktualë për sigurinë kombëtare dhe politikën e jashtme. Në vitin 2021, Biden revokoi lejen e sigurisë për Trump, i cili ishte gjithashtu një ish-president në atë kohë.