Forcat ukrainase kanë kapur fshatin Demidivka në rajonin Belgorod të Rusisë, kanë njoftuar kanale të shumta Telegram ruse pro luftës. Sipas pretendimeve të tyre, forcat ruse u tërhoqën nga fshati pa luftë, duke lejuar luftëtarët ukrainas të përparonin pa rezistencë.
Demidivka ndodhet përgjatë kufirit me Ukrainën dhe humbja e saj ka ngjallur një sërë reagimesh të frustruara mes blogerëve rusë dhe komentuesve të luftës, të cilët akuzojnë ushtrinë për një “tërheqje të çorganizuar” dhe “lënë ukrainasit të marrin pozicione pa gjuajtur asnjë e shtënë”.
Ky veprim është pjesë e një vale më të gjerë operacionesh ndërkufitare që Ukraina ka kryer javët e fundit, veçanërisht në zonat kufitare të rajonit të Belgorodit. Kujtojmë se forcat ukrainase dhe njësitë pro-ukrainase kanë kryer më parë inkursione të shumta në këtë rajon rus, duke përfshirë sulme të armatosura, diversione dhe sulme me raketa ndaj objektivave ushtarakë.
Në gusht të vitit të kaluar, Ukraina kreu një ofensivë të papritur në rajonin Kursk të Rusisë, duke kapur, sipas vlerësimeve të asaj kohe, rreth 1300 kilometra katrorë territor. Por pas disa muaj luftimesh, forcat ukrainase u tërhoqën nga shumica e këtyre zonave për shkak të kundërsulmeve të forta ruse dhe sfidave logjistike.
Megjithatë, kapja e Demidivka tregon se Ukraina po vazhdon taktikat e saj për të goditur territorin rus me qëllim të destabilizimit të kufirit, devijimit të forcave ruse nga fronti i Donbasit dhe forcimit të pozicionit të saj në informacion dhe luftë psikologjike.
