IRAN tha dje se ishte i hapur për bisedime indirekte me Shtetet e Bashkuara, pasi Presidenti Donald Trump kërkoi negociata për një marrëveshje të re bërthamore. “Rruga është e hapur për negociata indirekte,” tha Ministri i Jashtëm iranian Abbas Araghchi, duke përjashtuar mundësinë e bisedimeve të drejtpërdrejta “derisa të ketë një ndryshim në qasjen e palës tjetër ndaj Republikës Islamike,” raportoi The Economic Times .
Kryediplomati i Iranit tha se Teherani nuk do të angazhohet në bisedime të drejtpërdrejta me Uashingtonin nën kërcënime dhe për sa kohë që Trump ruan politikën e tij të “presionit maksimal”.
Sipas kësaj politike në mandatin e tij të parë presidencial, Trump tërhoqi SHBA-në nga një marrëveshje kyçe për programin bërthamor të Iranit në vitin 2018 dhe rivendosi sanksionet gjymtuese ndaj Teheranit. Marrëveshja, e nënshkruar në vitin 2015 midis Teheranit dhe fuqive perëndimore, i kërkonte Iranit të kufizonte ambiciet e tij bërthamore në këmbim të heqjes së sanksioneve.
Pasurimi ekskluzivisht për qëllime paqësore
Vendet perëndimore, duke përfshirë SHBA-në, kanë akuzuar prej kohësh Iranin për ndjekjen e armëve bërthamore, gjë që Teherani e ka mohuar, duke këmbëngulur se aktivitetet e tij pasuruese janë ekskluzivisht për qëllime paqësore. Në fillim të muajit, më 7 mars, Trump tha se i kishte shkruar një letër liderit suprem të Iranit, Ayatollah Ali Khamenei, duke bërë thirrje për negociata bërthamore dhe paralajmëruar për veprime të mundshme ushtarake nëse Teherani refuzonte.
Letra iu dorëzua Teheranit më 12 mars përmes një këshilltari të presidentit të Emirateve të Bashkuara Arabe, Anwar Gargash, njoftoi në atë kohë agjencia iraniane e lajmeve Fars.
Të premten, Khamenei tha se kërcënimet e SHBA-së “nuk do t’i çojnë askund”, duke paralajmëruar për masa reciproke “nëse bëjnë ndonjë gjë keqdashëse” kundër Iranit. Araghchi tha të enjten se letra e Trump ishte “më shumë një kërcënim”, por shtoi se ajo gjithashtu mund të hapë disa mundësi dhe se Teherani do të përgjigjet së shpejti.
Ndërtimi i besimit me Iranin
I dërguari i SHBA-së për Lindjen e Mesme, Steven Witkoff, në një intervistë të publikuar të premten, tha se qëllimi i Trump është të shmangë konfliktin ushtarak duke ndërtuar besimin me Iranin. Ai këmbënguli se letra nuk kishte për qëllim kërcënimin.
Teherani dhe Uashingtoni ndërprenë marrëdhëniet diplomatike pas Revolucionit Islamik të Iranit të vitit 1979 që përmbysi Shahun e mbështetur nga Perëndimi. Që atëherë, ambasada zvicerane në Teheran ka lehtësuar komunikimin midis dy kombeve.
Shteti i Gjirit të Omanit ka ndërmjetësuar gjithashtu bisedimet indirekte për çështjen bërthamore iraniane përmes të ashtuquajturit “procesi i Muskatit”, për të cilin Araghchi tha në tetor “aktualisht ishte ngecur”.
