Mungesa e teknikëve në Klinikën e Biokimisë Mjekësore së shpejti do të jetë më e dallueshme sesa tani, pas pensionimit të një pjese të stafit.
Kështu konfirmon Shemsi Veseli, drejtori i Klinikës së Biokimisë Mjekësore, në një intervistë për RTK-në.
“Punëtorët janë jashtë standardit të ngarkuar sepse sipas standardeve ndërkombëtare një doktor duhet të mbulohet me dy teknikë, ky numër realisht mungon. Veç sivjet 5 pensionohen dhe brenda 4 vjete mund të shkojnë gati 39 në pension dhe konsideroj që është e domosdoshme një numër i ri i stafit si teknik të laboratorëve”, ka thënë ai.
Veseli më tej ka folur për kushtet e punës, duke përfshirë kapacitetin që kanë aparaturat e reja në këtë sektor.
“Kapaciteti i tyre është jashtëzakonisht i madh, për arsye se brenda një ore janë në gjendje të kryejnë 1400 parametra gati prej një ore. Kur fillojnë ato të funksionojnë, ne mund të mbulojmë ndoshta në krejt spitalet e Kosovës punën nëse bëhet centralizimi i mirëfilltë. Kjo sidomos për analiza specifike si të vitaminave, tumor marker, sëmundjet auto-imune. Mendoj që është koha edhe të përfshihen analizat ende më specifike përshembull sindromi down, autizmi”, ka thënë Veseli për “Mirëmëngjesi Kosovë”.
