Drejtori i Klinikës së Biokimisë në QKUK, Shemsi Veseli ka thënë se dështimi i përmirësimit të sektorit të shëndetësisë nuk është përgjegjësi e vetëm e një subjekti politik, por e të gjitha subjekteve politike që kanë qeverisur në Kosovë.
Sipas tij, shëndetësia ka dështuar të zhvillohet sa duhet dhe të marrë prioritetin që meriton në agjendën e politikave të shtetit.
“Sa i përket sektorit të shëndotësisë përgjegjëse janë të gjitha subjektet politike. Shëndetësia është dashur të jetë top prioritet në agjendë, sepse buxheti është tejet i limituar. Një investim që do të ishte 10 milionë, shtetit do t’ia shpëtonte 30-40 milionë. Qytetari, si i sëmuri, si i shëndoshi e ka obligim t’i kryejnë analizat për të ditur një status të gjendjes së tij. Është edukatë qytetare, që se paku një herë apo dy herë brenda vitit t’i bëjë analizat, sepse edhe sëmundjet që po janë vrastare po janë shumë të fshehta dhe kur po zbulohen ato po janë në një stad ndoshta të vonuar dhe pastaj po e kemi shumë problematike kurimin e pacientëve. Prandaj, është më rëndësi që të zbulohet me kohë, sepse rezultati do të ishte më i kënaqshëm”, tha Veseli në emisionin “Mirëmëngjesi Kosovë“ në RTK.
Një tjetër çështje që Veseli e ka ngritur është ndikimi i sektorit privat në sistemin shëndetësor. Ai ka vënë në dukje se shumë institucione shëndetësore private kanë aksione dhe ndikime individë të politikës.
“Konsideroj se politikbërja është bërë për shkak të aksioneve në institucione të ndryshme private që kanë pasur dhe kësisoj është ngulfatur sektori publik. Po thua që njerëzit e politikës kanë aksione në institucionet shëndetësore private? Patjetër, nuk mund të mbijetojë një spital apo një laborator pa qenë dikush mbrapa. Nuk ka logjikë institucioni shtetëror të jetë më i dobët se sa një privat. Dhe në këtë kontekst po e them se sektori publik duhet të jetë shumë më përpara. Në rastin konkret laboratori i Biokimisë është dashur të jetë referues për të gjitha vlerat”, tha tutje Veseli.
Sipas tij qytetarët shpesh ankohen për rezultate të ndryshme nga laboratori në laborator dhe kjo sipas tij krijon shqetësim.
“Nuk është lehtë për një grua që është shtatzënë kur bën analizën te sektori privat, ku nuk ka kalibrime dhe kontrolle, i del sheqeri shumë i rritur. Ndërsa kur vjen te ne dhe i dalin vlerat dhe vërtetohen se janë normale, sepse ne asnjë hap nuk e bëjmë pa bërë kalibrime dhe kontrolla. Kjo normalisht ka kosto dhe për këtë arsye në sektorin privat kursejnë”, tha ai.
Madje Veseli përmendi rastin e një pacienti që në një laborator i janë përshkruar vlerat pa u kryer analizat. “Iu ka përshkruar në bazë të fizionomisë dhe gjendjes së fytyrës sepse nuk ka kurrfarë mundësie që analiza e vitaminës D të kryhet me 1 euro. As sektori shtetëror nuk mund ta bëjë, sepse nuk mund të kesh mbulueshmëri pasi kushton shumë më shtrenjtë. E ajo është vepër penale, është krim, por për fat të keq numri i inspektorëve është ende i vogël dhe nuk po mund të kontrollohen këto gjëra”, përfundoi Veseli.
