Presidenti serb Aleksandar Vuçiq ka takuar sot në Beograd Përfaqësuesin Special të Bashkimit Evropian për Dialogun Beograd-Prishtinë, Peter Sorensen dhe me atë rast e ka njohur me problemet me të cilat ballafaqohet populli serb në Kosovë.
“Një takim i parë i hapur dhe i drejtë me z. Sorensen, të cilin e njoha me problemet me të cilat ballafaqohet populli ynë në Kosovë dhe Metohi. Shpreha shqetësimin e veçantë për pozitën e vështirë të serbëve në Kosovë dhe Metohi për shkak të lëvizjeve të shumta përshkallëzuese, të njëanshme dhe të dhunshme të Prishtinës”, tha Vuçiq në Instagram.
Ai ka shtuar se ka vënë në dukje edhe pengesat e vazhdueshme që po i bën Prishtina në procesin e dialogut dhe ka ripërsëritur se formimi i Asociacionit të Komunave Serbe, pas 12 vitesh refuzim të Prishtinës për ta përmbushur atë obligim, është parakusht për fillimin e një normalizimi substancial të marrëdhënieve.
Vuçiq theksoi pritshmërinë që BE-ja të rrisë angazhimin e saj dhe të mbajë një rol të paanshëm në këtë proces.Kjo është vizita e parë e Sorensen në Beograd pas marrjes së detyrës.
