Shtetet e Bashkuara dhe Ukraina mund të nënshkruajnë një marrëveshje për burimet natyrore javën e ardhshme, tha Sekretari i Thesarit Scott Bessent për Fox News .
“Ne kemi dorëzuar një dokument të kompletuar mbi partneritetin ekonomik. Ai po shqyrtohet aktualisht nga ukrainasit dhe shpresojmë se diskutimet e plota do të fillojnë javën e ardhshme dhe ndoshta edhe nënshkrimet do të vendosen,” tha Bessent.
Marrëveshja ishte planifikuar të nënshkruhet në fund të shkurtit gjatë vizitës së presidentit ukrainas Volodymyr Zelensky në Uashington. Gjatë takimit ka ndodhur një sherr verbal mes presidentëve dhe dokumenti në fund nuk është firmosur.
Gjatë intervistës, Bessent u pyet edhe për sanksionet kundër Rusisë, të cilës ai u përgjigj se shtrëngimi ose lehtësimi i sanksioneve do të varej nga veprimet e mëtejshme të udhëheqjes ruse. “Presidenti Trump, mendoj se nuk do të hezitojë të forcojë sanksionet nëse kjo i jep atij një avantazh në negociata”, shtoi ministri.
Më herët, Trump tha se Uashingtoni po studionte kushtet e parashtruara nga Rusia për hyrjen në fuqi të armëpushimit në Detin e Zi për të cilin është rënë dakord në bisedimet në Riad. Trump konfirmoi se kishte pesë ose gjashtë kushte të përfshira. Kërkesat e Rusisë u renditën gjithashtu në faqen e internetit të Kremlinit, duke përfshirë heqjen e sanksioneve ndaj Rosselkhozbank dhe lidhjen e saj me sistemin SWIFT, gjë që është e pamundur pa pëlqimin e Bashkimit Evropian.
