Ministrja e Punëve të Jashtme dhe Diasporës, Donika Gërvalla, ka mirëpritur vendimin e Republikës së Kenias për të njohur zyrtarisht Republikën e Kosovës.
Ajo e ka cilësuar këtë vendim si një lajm të rëndësishëm që thekson përparimin dhe forcimin e pozitës së Kosovës në skenën ndërkombëtare dhe në kontinentin afrikan.
“Nga takimi i parë që kemi pasur në vitin 2021 bashkë me Presidenten Vjosa Osmani me ish-Presidentin Uhuru Kenyatta, kemi parë rrugën graduale drejt njohjes reciproke. Mezi presim ndërtimin e marrëdhënieve të mirëfillta diplomatike me Republikën e Kenias dhe fillimin e bashkëpunimit mes dy shteteve tona në fusha të ndryshme,” ka thënë Gërvalla.
