Aktivisti i shoqërisë civile, Dibran Hoxha, ka ndërmarrë një aksion simbolik kundër paralajmërimit për shtrenjtimin e rrymës me 15%.
Në një video të publikuar në rrjetin social Facebook, Hoxha shihet duke ia hedhur një tortë kryetarit të Bordit të Zyrës së Rregullatorit për Energji (ZRRE), Ymer Fejzullahut, teksa ai po hynte në veturën e tij me porosinë “e ke dhuratë prej qytetarëve”.
“15% nuk kalon! Pas kërkesave të shumta nga qytetarët, kemi vendosur ta ‘ëmbëlsojmë’ kryetarin e ZRrE-së me 15%. Zotni Ymerit i pëlqejnë tortat me pronarët e KEDS-it, ndaj sigurisht që duhet t’i pëlqejnë edhe tortat e qytetarëve. Urime!”, ka shkruar Hoxha në Facebook.
Ndërkohë, për 5 prill është paralajmëruar një protestë qytetare kundër rritjes së çmimit të energjisë elektrike. Luan Hasanaj nga iniciativa “Asnjë cent më shumë” ka deklaruar për RTK-në se protesta është rruga e vetme që i ka mbetur qytetarëve për të kundërshtuar këtë vendim.
“Nëse rritet çmimi i rrymës, do të pasojë një zinxhir shtrenjtimesh. Qytetarët duan vetëm të kenë mundësi të jetojnë normalisht në këtë vend. Rruga e vetme për të kërkuar llogari dhe përgjegjësi është protesta, sepse në fund të fundit, qytetarëve nuk u interesojnë aspektet teknike apo investimet në termocentrale – atyre u intereson ekzistenca”, ka theksuar Hasanaj.
