Komisioni Evropian ka nisur pagesat e para nga Plani i Rritjes për shtetet e Ballkanit Perëndimor, por për momentin këto mjete nuk i kanë marrë as Kosova dhe as Serbia.
Ndryshe nga vendet e tjera të rajonit, këto dy shtete kanë një parakusht shtesë të lidhur me procesin e normalizimit të marrëdhënieve.
“Në kuadër të procedurës për Planin e Rritjes, ekziston një parakusht për Serbinë dhe Kosovën, që nënkupton angazhimin konstruktiv në dialog, në kontekstin e normalizimit të marrëdhënieve. Në këtë fazë nuk mund të konfirmoj nëse ky kusht është përmbushur apo jo. Kjo do të qartësohet pasi të merret një vendim për parafinancim”, tha Guillaume Mercier – zëdhënës i KE-së.
Burime mirë të informuara bëjnë të ditur se Kosova dhe Serbia do të pranojnë fondet e parafinancimit, por në periudha të ndryshme. Dialogu nuk paraqet një pengesë, meqë, siç merret vesh, ky parakusht tashmë është vlerësuar pozitivisht si për Prishtinën, ashtu edhe për Beogradin.
Serbia pritet të marrë këstin e parë në ditët në vijim, ndërsa Kosova do të mund të llogarisë në këto mjete vetëm pas formimit të institucioneve të reja, pasi ratifikimi i marrëveshjes në Parlament është i domosdoshëm.
Ndërkohë, Shqipëria dhe Maqedonia e Veriut tashmë kanë marrë fondet e parafinancimit, që përbëjnë 7% të shumës totale. Kosova pritet të përfitojë mbi 880 milionë euro nga Plani i Rritjes, ndërsa shuma e parafinancimit arrin në 56.6 milionë euro.
