Presidentja e shtetit, Vjosa Osmani ka qëndruar në shtëpinë muze të nënës Ferdonije Çerkezi, në 26-vjetorin e rrëmbimit të dhunshëm nga regjimi gjenocidal serb të bashkëshortit dhe 4 djemve të saj.
Presidentja, bashkë me nënë Ferdonijen, që gjeti eshtrat e vetëm dy djemve dhe ende vazhdon t’i kërkojë edhe dy djemtë e tjerë dhe bashkëshortin, ka takuar edhe nënat e tjera gjakovare të cilat kanë humbur të dashurit e tyre nga krimet makabre të Serbisë.
Presidentja ka thënë se dhimbja e nënës Ferdonije është dhimbje dhe kauzë e gjithë Kosovës.
“Në 26-vjetorin e rrëmbimit të dhunshëm nga regjimi gjenocidal serb të bashkëshortit dhe 4 djemve të saj, sot isha për vizitë te Nëna Ferdonije në shtëpinë-muze të familjes Çerkezi në Gjakovë. Bashkë me Nënën Ferdonije takuam edhe nënat e tjera të Gjakovës të cilat kanë humbur të dashurit e tyre nga krimet makabre të Serbisë. Eshtrat e dy djemve të Nënës Ferdonije janë gjetur, teksa fati i bashkëshortit dhe dy djemve të tjerë vazhdon të mbetet peng. Megjithatë, ajo nuk është dorëzuar. Dhimbjen e ka shndërruar në forcë, stoicizëm dhe në kauzë për drejtësi. Dhimbja e saj është edhe e jona. Kauza e saj është edhe e jona. Dhimbje e kauzë e gjithë Kosovës”, ka shkruar Osmani e cila qëndroi në shtëpinë muze të familjes Çerkezi, aty ku e vetme jeton nënë Ferdonija.
