Presidentja e Kosovës, Vjosa Osmani, ka njoftuar se ka pasur një bisedë të re me Presidentin e Kenias, William Ruto, pas njohjes së Kosovës nga ky shtet. Osmani e ka cilësuar këtë akt si një shenjë të miqësisë së vërtetë dhe një forcim të pozicionit ndërkombëtar të Kosovës.
Ajo ka shprehur mirënjohjen në emër të popullit të Kosovës dhe ka thënë se angazhimi i Kosovës për të vendosur marrëdhënie diplomatike me Kenian është i palëkundur. “Shpreha mirënjohjen e thellë në emër të popullit të Kosovës dhe ripohova angazhimin tonë për të ngritur sa më shpejtë marrëdhënie diplomatike,” ka thënë Osmani.
Kreu i shtetit të Kosovës theksoi se gjatë bisedës u diskutua mundësia për thellimin e bashkëpunimit në fusha të ndryshme si tregtia, arsimi dhe turizmi. “Vazhduam bisedën nga takimet tona të mëparshme mbi mundësitë për thellimin e bashkëpunimit në fushat e tregtisë, arsimit, turizmit dhe fushat e tjera të interesit të përbashkët,” theksoi Osmani.
Osmani gjithashtu e ftoi presidentin Ruto të vizitojë Kosovën dhe shprehu gatishmërinë për të vizituar Keninë së shpejti.
“Pres me padurim të mirëpres presidentin Ruto në Kosovë dhe të vizitoj Kenian së shpejti, siç kemi biseduar prej kohësh. Kenia mund të mbështetet në Kosovën si një aleat dhe partner të vërtetë,” shtoi ajo.
“Një kapitull i ri i partneritetit fillon!”, theksoi presidentja Osmani.
