Presidentja e Kosovës, Vjosa Osmani, ka vizituar Krushën e Vogël për të shprehur solidaritet dhe mbështetje për gratë e kësaj zone.
“Në prag të festës së Bajramit, u kthyem përsëri në Krushë të Vogël për të bashkëbiseduar me nëna, motra e gra, si dhe për ta ndarë dhimbjen, forcën dhe dashurinë”, njoftoi Osmani.
Në këtë vizitë, ajo u shoqërua nga përfaqësues të komunitetit shqiptar nga Philadelphia, SHBA, të cilët sollën dhurata të mbledhura me përkushtim nga vëllezërit Osmanollaj dhe Emina Cunmulaj.
Këta të fundit, më 8 Mars, për Ditën e Gruas, kishin organizuar një ngjarje mbështetëse për këtë kauzë fisnike.
“Duke i falënderuar bashkatdhetarët tanë për kujdesin dhe zemërgjerësinë e vazhdueshme, isha e lumtur që, edhe pse pak më herët, arritëm t’ju gjindemi pranë nënave të Krushës për të ndarë solidaritet, dashuri dhe kujdes në prag të festës së Bajramit,” u shpreh presidentja Osmani.
