Presidenti serb Aleksandar Vuçiq tha sot për Financial Times (FT) se nuk sheh ndryshim në qëndrimin amerikan në lidhje me vendosjen e sanksioneve ndaj industrisë serbe të naftës dhe se nëse sanksionet hyjnë në fuqi pas skadimit të afatit të premten, Serbia fillimisht do të presë reagimin e Rusisë dhe më pas do të reagojë.
Vuçiq thotë, siç shton gazeta britanike, se negociatat me palën amerikane për çështjen e NIS nuk kanë lëvizur nga “pika e vdekur”.
“Nëse sanksionet hyjnë në fuqi, do të duhet të shohim sa më shpejt reagimin e palës ruse dhe më pas do të duhet të reagojmë”, theksoi presidenti serb.
Sipas tij, qëndrimi rus është se ata duan të mbajnë aksionet e tyre në NIS “me çdo kusht”.
Vuçiq pranoi se ai “nuk është i sigurt se Janaf do të ndalojë transportin e naftës” të premten, kur skadon afati për arritjen e një marrëveshjeje për të shmangur sanksionet e SHBA.
Shumica e importeve të naftës së papërpunuar të Serbisë mbërrijnë nëpërmjet një tubacioni në pronësi të Janaf të Kroacisë, i cili do të duhet të pezullojë biznesin me NIS për të shmangur shkeljen e kufizimeve të SHBA, vë në dukje FT.
“Para së gjithash, ne duhet të kemi një treg plotësisht të siguruar të naftës në vendin tonë, që do të thotë furnizim të plotë me naftë për rafinerinë tonë dhe tregun tonë të benzinës”, tha Vuçiq.
Ai shtoi se çmimi nuk është problem dhe se zgjidhja, siç thotë ai, mund të gjendej “lehtë” nëse do të bëhej marrëveshje për kalimin e pronësisë së NIS.
Gazeta britanike kujton se në janar, Departamenti Amerikan i Thesarit i bëri thirrje Gazpromit shtetëror rus dhe filialit të tij Gazpromneft që të shesin aksionet e tyre shumicë në rafinerinë serbe NIS, duke kërcënuar se në të kundërt do të përballen me sanksione.
Siç u tha, pronarët rusë refuzuan të shesin 56 për qind të aksioneve të tyre në NIS, por ndryshuan strukturën e pronësisë në mënyrë që as Gazprom dhe as Gazpromneft të mos kenë shumicën e aksioneve në NIS.
FT thekson se një zgjidhje e mundshme, sipas informacioneve nga industria e naftës, është që grupi hungarez i naftës MOL të ndërhyjë dhe të blejë aksionet ruse në NIS.
I pyetur se deri në çfarë mase çështja e NIS është pjesë e diskutimit më të gjerë ruso-amerikan në kontekstin e përfundimit të luftës në Ukrainë, Vuçiq tha se sipas tij kjo është një çështje “e vogël” për negociatorët.
FT thekson se presidenti serb mban marrëdhënie me Kremlinin dhe ka refuzuar t’i bashkohet sanksioneve të BE-së kundër Moskës.
